ރާއްޖޭގެ ކޮންމެ ރަށަކާއި ކައިރިން ދެވޭނެ ޕިކްނިކް އައިލެންޑެއް ހަމަޖައްސާނެ ކަމަށް ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހުގެ "އުފާވެރި އަމާން ރާއްޖެ" މެނިފެސްޓޯގައި ހިމަނައިފި އެވެ.
ރިޔާސީ އިންތިހާބަށް ރައީސް ސޯލިހުގެ ސިޔާސަތުތައް ހާމަކުރަން ފަށާފައިވާއިރު ފުރަތަމަ އާންމުކުރީ "އުފާވެރި ދިރިއުޅުން" ގެ ސިޔާސަތުތަކާއި ވައުދުތަކެވެ.
އެގޮތުން ރާއްޖޭގެ ކޮންމެ ރަށަކާއި ކައިރިން ދެވޭނެ ޕިކްނިކް އައިލެންޑެއް ހަމަޖެއްސުމަށާއި ރައްކާތެރިކަމާއެކު މޫދަ އެރޭނެ ސަރަހައްދެއް ކޮންމެ ރަށެއްގައިވެސް ގާއިމުކުރާނެ ކަމަށް ވަނީ މެނިފެސްޓޯގައި ހިމަނާފަ އެވެ.
ފެހިކަން ބޮޑު، ހިތްފަސޭހަ، އުފާވެރި ހިޔާކަން ބޮޑު ސަރަހައްދުތައް ކޮންމެ ރަށެއްގައިވެސް އިތުރުކުރުމަށް ހިމަނާފައިވެ އެވެ.
މީގެ އިތުރުން ރާއްޖޭގެ ހުރިހާ ރަށެއްގައިވެސް އާއިލާއާއި ކުޑަކުދިންނާ ރަހުމަތްތެރި އާއްމު ތަންތަން ކަނޑައަޅާ ކުޑަކުދިންނަށް ހެލިފެލިވެ އުޅެވޭނެ ރައްކާތެރި މާހައުލެއް ގާއިމުކުރަން މެނިފެސްޓޯގައި ވަނީ ހިމަނާފަ އެވެ.
މެނިފެސްޓޯގައި ހިމަނާފައިވާ އިތުރު ކަންތައްތަކުގެ ތެރޭގައި އާބާދީގެ ކޮންމެ 1،000 މީހަކަށް ތަމްރީނު ލިބިފައިވާ އިޖުތިމާއީ އެހީތެރިއެއް ހަމަޖެއްސުމާއި ޑިޖިޓައިޒްޑް ނިޒާމެއް މެދުވެރިކޮށް ލުއިފަސޭހަކަމާއެކު އިޖުތިމާއީ އެހީ ހޯދޭނެ ގޮތް ހަމަޖެއްސުން ހިމެނެ އެވެ.