ރިޔާސީ އިންތިހާބުގެ ކެމްޕޭން ރަސްމީކޮށް ފެށި ފަހުން ސަރުކާރުން މިހާތަނަށް އެއް ބިލިއަން ރުފިޔާގެ މަޝްރޫއު ކުންފުނިތަކާ ހަވާލުކޮށްފައިވާ ކަމަށާއި އެއީ ރިޔާސީ އިންތިހާބަށް ނުފޫޒު ފޯރުވުން ކަމަށް ޓްރާންސްޕޭރަންސީ މޯލްޑިވްސް އިން ބުނެފި އެވެ.
ޓްރާންސްޕޭރަންސީ މޯލްޑިވްސް އިން ނެރުނު ބަޔާނެއްގައި ބުނީ ރިޔާސީ ކެމްޕޭންގައި ދައުލަތުގެ ވަސީލަތްތަކާއި ސަރުކާރު ހިއްސާވާ ކުންފުނިތަކުގެ ވަސީލަތްތައް ބޭނުންކުރާކަން ފާހަގަކުރެވިފައިވާ ކަމަށެވެ.
ރިޔާސީ އިންތިހާބުގައި ކެމްޕޭންކުރުން މިމަހުގެ 10 ވަނަ ދުވަހު ރަސްމީކޮށް ފެށިފަހުން އާ 14 މަޝްރޫއެއް ޖުމްލަ އެއް ބިލިއަނަށްވުރެ ގިނަ ރުފިޔާއަށް ސަރުކާރުގެ ދެ ކުންފުންޏަކަށް ހަވާލުކޮށްފައިވާ ކަމަށް ޓްރާންސްޕޭރަންސީ އިން ވަނީ ބުނެފަ އެވެ.
ޕްލޭނިން މިނިސްޓްރީން މިދިޔަ އަހަރުގެ އޮގަސްޓް މަހު ހަވާލުކުރީ ފަސް މަޝްރޫއު ކަމަށާއި އެއީ 261 މިލިއަން ރުފިޔާގެ މަޝްރޫއު ކަމަށް ޓްރާންސްޕޭރަންސީން ވަނީ ބުނެފަ އެވެ.
ޓްރާންސްޕޭރަންސީން ބުނީ އޮގަސްޓް 10 އިން 19 އަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ތަފާތު 16 ރަށެއްގައި 32 މަޝްރޫއެއްގެ ނިންމުން ނުވަތަ ފެށުން ފާހަގަކުރައްވާފައިވާ ކަމަށެވެ. އޭގެ ތެރޭގައި 2021 އަދި 2022 ވަނަ އަހަރު ނިމިފައިވާ މަޝްރޫއު ހިމެނޭ ކަމަށެވެ.
ކެމްޕޭން ދަތުރުފުޅުތަކުގައި ރަސްމީ މަސައްކަތް ކުރެއްވުމުން ރައީސްގެ ރަސްމީ މަސައްކަތްތަކާއި ކެމްޕޭން ކުރެއްވުމާ ދެމެދު އޮތް ފަރަގު ދެނެގަންނަން އުނދަގޫވާ ކަމަށް ޓްރާންސްޕޭރަންސީން ބުނެފައިވެ އެވެ.