ރާއްޖޭގެ އިންޝުއަރެންސް ދާއިރާ ހަރުދަނާ ކުރުމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ -- އެމްއެމްއޭ އާއި ޔޫއެންޑީޕީން އެއްބަސްވުމެއްގައި މިއަދު ސޮއިކޮށްފި އެވެ.
އިންޝުއަރެންސް ދާއިރާ ހަރުދަނާކުރުމުގެ މި އެއްބަސްވުމުގައި އެމްއެމްއޭގެ ފަރާތުން ސޮއިކުރެއްވީ ގަވަރުނަރު އަލީ ހާޝިމެވެ. ޔޫއެންޑީޕީގެ ފަރާތުން ސޮއިކުރެއްވީ ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ސަފީރު އެންރީކޯ ގަވޭލިއާ އެވެ.
އެއްބަސްވުމުގައި ސޮއިކުރުމުގެ ރަސްމިއްޔާތުގައި އަލީ ހާޝިމް ވިދާޅުވީ އެއްބަސްވުމާއެކު މުޅި މާލީ ދާއިރާއިން ރަނގަޅު ބަދަލުތަކެއް ފެންނާނެ ކަމަށެވެ.
އެ ބަދަލުތަކަކީ ދެމެހެއްޓެނިވި ތަރައްގީ އާއި އިގުތިސާދީ ގޮތުން ކުރިއެރުން ގެންނާނެ ބަދަލުތަކެއް ކަމަށްވެސް އަލީ ހާޝިމް ވިދާޅުވި އެވެ.
މި ރަސްމިއްޔާތުގައި ވާހަކަ ދައްކަވަމުން ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ސަފީރު އެންރީކޯ ގަވޭލިއާ ވިދާޅުވީ މޫސުމީ ބަދަލުތަކުން ދިމާވާ ގެއްލުންތަކުން އަރައިގަތުމަށް ރަނގަޅު އިންޝުއަރެންސް ނިޒާމެއް ރާއްޖެއަށް ބޭނުންވާ ކަމަށެވެ.
ޔޫއެންޑީޕީން ބުނީ މި އެއްބަސްވުމުގެ ދަށުން އިންޝުއަރެންސް ދާއިރާއަށް ބޭނުންވާ މުހިންމު ގަވައިދުތައް ހަރުދަނާ ކުރާނެ ކަމަށެވެ. އެގޮތުން ޔޫއެންޑީޕީން މިއަހަރުގެ ކުރީކޮޅު ހެދި "އިންޝުއަރެންސް ސެކްޓާ ޑައިގްނޯސްޓިކް ސްޓަޑީ"އިން ފާހަގަވި ކަންކަމާއި ގުޅޭ ގޮތުން ގެންނަންޖެހޭ ބަދަލުތައް ގެންނާނެ ކަމަށް ޔޫއެންޑީޕީން ވަނީ ބުނެފަ އެވެ.
