ވިޔަފާރި ފެށުމަށް ބޭނުންވާ ބިޒްނަސް ޕްލޭން ހުށަހެޅުމުން ފައިސާ އާއި ވަސީލަތްތައް ފަހިކޮށްދެއްވާނެ ކަމަށް ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕޭންގައި އިލްޔާސް ވިދާޅުވީ ޑިމޮކްރެޓުންގެ ވެރިކަމެއްގައި ވިޔަފާރިވެރިންނަށް ފުރުސަތުތައް ފަހިކޮށްދޭނެ ކަމަށެވެ.
އެގޮތުން ބިޒްނަސް ޕްލޭން ހުށަހެޅުމުން 15 ދުވަހުގެ ތެރޭގައި ފައިސާ އާއި ވަސީލަތްތައް ފަހިކޮށްދެއްވާނެ ކަމަށް އިލްޔާސް ވިދާޅުވި އެވެ.
އިލްޔާސް ވިދާޅުވީ ވިޔަފާރިތަކަށް މާލީ އެހީތެރިކަން ފޯރުކޮށްދިނުމުގެ ސިޔާސަތުތައް ޑިމޮކްރެޓުންގެ މެނިފެސްޓޯގައި "ފަސޭހަ ވިޔަފާރި" ސިޔާސަތުތަކުގެ ތެރޭގައި ހިމަނާފައިވާ ކަމަށެވެ.
ޑިމޮކްރެޓުންގެ ފަސޭހަ ވިޔަފާރި ސިޔާސަތުތަކުގެ ދަށުން ވިޔަފާރިތަކަށް ބޭނުންވާ ތަމްރީންތައްވެސް ފަހިކޮށްދޭނެ ކަމަށް އިލްޔާށް ވިދާޅުވި އެވެ.
ރިޔާސީ އިންތިހާބުގެ ކެމްޕޭންގައި އިލްޔާސް ވަނީ ޖީއެސްޓީ ނަގާ ރޭޓް އަށް ޕަސަންޓުން ހަ ޕަސަންޓަށް ކުޑަ ކުރައްވާނެ ކަމަށް ވިދާޅުވެފަ އެވެ. މީގެ އިތުރުން ގްރީން ޓެކުހުގެ ގޮތުގައި ލިބޭ އާމްދަނީގެ 50 ޕަސަންޓް އެ އަތޮޅެއްގެ ކައުންސިލަށް ދެއްވާނެ ކަމަށްވެސް ވިދާޅުވެފަ އެވެ.