ޑްރަގް ކޯޓުގެ ފަނޑިޔާރުންގެ އޯގާތެރިކަން ރައްޔިތުން ބަލައިގަންނަ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
ޑްރަގް ކޯޓަށް 11 އަހަރު ފުރުން ފާހަގަކުރުމަށް ރޭ ބޭއްވި ހަފުލާގައި ވާހަކަ ދައްކަވަމުން ނަސީމް ވިދާޅުވީ އެ ކޯޓުގެ ފަނޑިޔާރުންގެ އޯގާތެރިކަމުގެ ވާހަކަ ރައްޔިތުން ފާހަގަކުރާ ކަމަށެވެ.
އެގޮތުން އަޑުއެހުންތަކުގައި ގާޒީން ގެންގުޅޭ ބަހުރުވަ އާއި ވާހަކަ ދައްކާއިރު ބަހައްޓާ އޯގާތެރިކަން ރައްޔިތުން ބަލައިގަންނަ ކަމަށް ނަސީމް ވިދާޅުވި އެވެ.
ނަސީމް އިތުރަށް ވިދާޅުވީ މަސްތުގައި ޖެހިފައިވާ މީހުން އަނބުރާ މުޖުތަމައުއަށް ނެރުމަށް ޑްރަގް ކޯޓުގެ ދައުރު ބޮޑު ކަމަށެވެ.
އެގޮތުން ޑްރަގް ކޯޓުގެ ނިޒާމަކީ ރާއްޖޭގެ އިތުރުން އެހެން ގައުމުތަކުގައިވެސް ކާމިޔާބު ނިޒާމެއް ކަމަށާއި ކޯޓުގެ ހިދުމަތް ފުޅާކުރަންޖެހޭ ކަމަށް ނަސީމް ވިދާޅުވި އެވެ.
މީގެ އިތުރުން ނަސީމް ވަނީ ޑްރަގް ކޯޓަށް ހުށަހެޅި ބަލަން ފަށާ މައްސަލަތައް ގިނަވިޔަ ނުދީ ހަލުވިކޮށް ކުރިއަށް ގެންދާކަން ފާހަގަކުރައްވާފަ އެވެ.