އެކުގައި ގިނައިން އުޅެން ޖެހުމުގެ ސަބަބުން ގާތްވެ އެކުވެރިކަން އުފެދޭ ރަހުމަތްތެރިންގެ ގުޅުން ބަދަހިވާނެ އެވެ. އެފަދަ ރަހުމަތްތެރިންނަކީ ތިމާ އިތުބާތުކުރާ، ގާތް މީހުންނަށް ވެސް ވެގެންދެ އެވެ. ނަމަވެސް ދިރިއުޅުމުގައި ދިމާވާ އެކި ކަންކަމުގެ ސަބަބުން ރަހުމަތްތެރިންނާ މައްސަލަ ޖެހުން އެއީ އާންމު ކަމެކެވެ.
މައްސަލަ ޖެހުމަކީ ރަހުމަތްތެރިކަން އެއްކޮށް ނިންމާލަން ޖެހޭ ވެސް ކަމެއް ނޫނެވެ. އެ ޖެހުނު މައްސަލައަކަށް ހައްލު ހޯދަން ޖެހޭނެ އެވެ. ރަހުމަތްތެރިންނަކީ އާއިލާ ބައެއްގެ ގޮތުގައި ބެލެވި އެމީހުންގެ މައްސަލަތަކުގެ ތެރެއަށް ތިމާއަށް ވަދެވިއްޖެނަމަ، ރަހުމަތްތެރިންނާ މައްސަލަ ޖެހުން އަވަސްވެ އެވެ. ބައެއް ފަހަރަށް ރަހުމަތްތެރިންގެ ހަޔާތުގައި ދިމާވާ ކަންތައްތަކުގެ ތެރެއަށް ވަދެވިއްޖެނަމަ، ގުޅުމަށް ވެސް ބުރު އަރަ އެވެ.
އެހެންނަމަވެސް ރަހުމަތްތެރިންގެ ހަޔާތުގައި ދިމާވާ ކަންތައްތަކުގެ ތެރެއަށް ނުވަދެ، ދުރުގައި ބަލަން ހުރުމަކީ ގާތް ރަހުމަތްތެރިންނަށް ފަސޭހަ ކަމަކަށް ނުވާނެ އެވެ. ރަހުމަތްތެރިޔާއަށް ދެރަ ގޮތްވުމަކީ އެއްވެސް މީހަކު އެދޭނެ ކަމެއް ނޫނެވެ.
ރަހުމަތްތެރިންގެ ހަޔާތުގައި އަންނަ ބަނަ ދުވަސްތަކުގައި އަބަދުވެސް އެކުގައި ހުރުމަށް ކޮންމެ އެކުވެރިޔަކު ވެސް ބޭނުންވާނެ އެވެ. ހަމައެފަދައިން އެ ބަނަކަމުން ރަހުމަތްތެރިޔާ އަމާން އައްސޭރިއަކަށް ގެންގޮސްދޭން ވެސް ތެދުވެރި ރަހުމަތްތެރިން ބޭނުންވާނެ އެވެ. ބައެއް ފަހަރަށް ރަހުމަތްތެރިންނަށް ދިމާވާ ކަންކަމަށް ހައްލެއް ހޯދައިދިނުމުގެ ގޮތުން، ރަހުމަތްތެރިޔާއަށް ދޮގު ހަދަން ޖެހޭ ދަނޑިވަޅުތަކާ ވެސް ކުރިމަތިވެ އެވެ. އެއީ ރަހުމަތްތެރިޔާގެ އިތުބާރު ގެއްލުވާލަން ކުރާ ނޫނެވެ. ނަމަވެސް، އެއީ ރަހުމަތްތެރިޔާއަށް ރަނގަޅު ގޮތް އެދޭތީކުރާ ކަމެކެވެ.
ރަހުމަތްތެރިޔާ މައްސަލައެއްގެ ތެރެއިން ނެރުމަށް އަމިއްލައަށް މައްސަލަތަކެއްގެ ތެެރެއަށް ވަންނަ އެކުވެރިން ވެސް މަދެއް ނުވާނެ އެވެ. އެފަދަ ރަހުމަތްރެރިންނަކީ ހަގީގީ އެކުވެރިންނެވެ. އެފަދަ ރަހުމަތްތެރިންނާ ގުޅުން ކަނޑާލުމުގެ ބަދަލުގައި، ގުޅުން އިތުރަށް ބަދަހިކުރާށެވެ. ފަހަރުގައި ގެއްލިދާނީ އެންމެ ހެޔޮއެދޭ އެކުވެރިޔާ ކަމަށް ވެސްވެދާނެ އެވެ.
ރަހުމަތްތެރިޔަކާ މައްސަލަ ޖެހިއްޖެ ނަމަވެސް، ރަހުމަތްތެރިޔާގެ ވާހަކަތައް އަޑުއަހަން ވާނެ އެވެ. އޭނާއަށް ޖަވާބުދޭން ފުރުސަތު ދޭން ވާނެ އެވެ. ރަހުމަތްތެރިން ތިމާއަށް ދެރަ ގޮތެއް ނުހަދާނެ އެވެ. ދިމާވާ ކަންތައްތަކެއްގެ ސަބަބުން އެކުވެރިޔާ ގެއްލުވާ ނުލާށެވެ. އެ އެކުވެރިޔާ މަސައްކަތް ކުރީ ތިމާގެ މައްސަލަތައް ހައްލުކުރާށެވެ. އެކަމުގައި ދޮގެއް ހެދުނު ނަމަވެސް އެ އެކުވެރިޔާއަކަށް މާފުކުރާށެވެ.
