ރައްޔިތުންގެ މަޖިލީހުގައި އައްޑޫ ސިޓީ ތަމްސީލް ކުރާ އެމްޑީޕީގެ ދެ މެންބަރަކަށް ބަޔަކު ހަމަލާދީފި އެވެ.
ގުރޫޕަކުން ހަމަލާދީފައިވަނީ މަރަދޫ ދާއިރާގެ މެންބަރު އިބްރާހީމް ޝަރީފާއި، ފޭދޫ ދާއިރާގެ މެންބަރު މުހައްމަދު ނިހާދަށެވެ.
ނިހާދަށް ހަމަލާދިނީ ފޭދޫ ސްކޫލު ކައިރިންނެވެ. ހަމަލާގެ ކުރިން ނިހާދާއި ކޮންމެވެސް ބަޔަކާ ދެމެދު ޒުވާބެއް ހިނގި ކަމަށް ބައެއް މީހުންގެ ފަރާތުން މައުލޫމާތު ލިބިފައިވެ އެވެ. އަދި ފޭދޫ ސިއްހީ މަރުކަޒުގައި ނިހާދަށް ފަރުވާ ދެމުންދާ ކަމަށްވެސް އެނގިފައިވެ އެވެ.
ޝަރީފަށް ހަމަލާދިނީ މާލޭގައި ހުންނަ މެންހަޓަން ހޮޓަލް ތެރެއިން ކަމަށް އޭނާ ވިދާޅުވެފައިވެ އެވެ. ޝަރީފް ވެސް ގެންދަނީ ފަރުވާ ހޯއްދަވަމުންނެވެ.
ފުލުހުންނަށް މި ދެ މައްސަލަ ވެސް ހުށަހަޅާފައިވާތީ ފުލުހުން ގެންދަނީ މައްސަލަ ތަހުގީގުކުރަމުންނެވެ.
