ކުޑަ ކުއްޖަކަށް ޖިންސީ ގޯނާ ކުރި ކަމަށް ތުހުމަތުވި މައްސަލާގައި ހައްޔަރު ކޮށްފައި ހުއްޓާ ފިލްމީ ތަރި މުހައްމަދު ޔުނާން ދޫކޮށްލި މައްސަލަ ހައިކޯޓުގައި އިސްތިއުނާފް ކޮށްފި އެވެ.
ޕްރޮސެކިއުޓާ ޖެނަރަލް އޮފީހުން ބުނީ ޔުނާން ދޫކޮށްލި މައްސަލަ އިސްތިއުނާފް ކުރީ މިިދިޔަ ހޯމަ ދުވަހު ކަމަށެވެ.
ހުޅުމާލެ ކޯޓުގެ މެޖިސްޓްރޭޓް ސިޔާމާ މުހައްމަދު މިމަހުގެ 14 ވަނަ ދުވަހު ނިންމެވި ނިންމުމުގައި ޔުނާން ދޫކޮށްލީ ޝަރުތުތަކެއް ކުރުމަށްފަހު އެވެ. އެގޮތުން ކޯޓުގެ ހުއްދަ ނެތި ފުރައިގެން އެއްވެސް ތަނަކަށް ނުދިއުމާއި، ޒަރޫރީ ކަމެއްގައި ނޫނީ ގެއިން ބޭރަށް ނުދިއުމާއި، ދިރިއުޅޭ ތަން ކޯޓަށް އެންގުމަށް ޝަރުތުކޮށްފައިވެ އެވެ.
ކުޑަ ދެ ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ޔުނާން އާއި އޭނާގެ އަންހެނުން ފާތިމަތު ރިހުލާ ހައްޔަރުކުރީ 2020 ވަނަ އަހަރުގެ އޮކްޓޫބަރުގެ ތެރޭގައެވެ. ޝަރީއަތް ނިމެންދެން މި ދެ މީހުން ބަންދުގައި ބޭތިއްބުމަށް ކޯޓުން ކުރިން އަމުރުކުރީ އޮކްޓޫބަރު 12، 2020 ގައެވެ.
ޔުނާން މިމަހުގެ 14 ވަނަ ދުވަހު ދޫކޮށްލިއިރު މިދިޔަ މާޗް މަހުގެ ތެރޭގައި ވަނީ ރިހުލާ ދޫކޮށްލާފަ އެވެ.
ތުހުމަތު ކުރެވޭ މައްސަލާގައި ޔުނާންގެ މައްޗަށް ނުވަ ދައުވާއެއް އަދި ރިހުލާގެ މައްޗަށް ފަސް ދައުވާއެއް ދައުލަތުން ކުރެ އެވެ. މައުލޫމާތު ލިބިފައިވާ ގޮތުގައި މިއްސަލަ މިހާރު އޮތީ ހުޅުމާލެ ކޯޓުގައި ނިމުމަކާ ހަމައަށް ގޮސްފަ އެވެ.
ޔުނާން އާއި ރިހުލާގެ މައްޗަށް ކުޑަކުއްޖަކާއެކު ގަދަކަމުން ޖިންސީ އަމަލެއް ހިންގުމުގެ ތުހުމަތުކޮށް އެ މައްސަލަ ފުލުހަށް ރިޕޯޓް ކޮށްފައިވަނީ ޔުނާންގެ އެއްބަނޑު އެއްބަފާ ބޭބެ ކަމަށްވެ އެވެ.