އެޗްޑީސީ އިން ދޫކުރާ ފްލެޓެއް މީހަކަށް ލިބިފައިވާ ކަމަށް ބުނެ އެ މީހާގެ އެކައުންޓުން އޮޅުވާލައިގެން ދެ ލައްކަ ރުފިޔާ ނަގާފައިވާ މައްސަލައެއް ތަހުގީގުކުރަން ފަށައިފި އެވެ.
ފުލުހުން ބުނީ މަކަރާއި ހީލަތް ހަދައިގެން ފައިސާތަކެއް އަތުލާފައިވާ މިމައްސަލަ އިއްޔެ ހަވީރު ފުލުހުންނަށް ރިޕޯޓްކޮށްފައިވާ ކަމަށެވެ.
މިމައްސަލައިގެ ތުހުމަތުގައި އަދި އެއްވެސް މީހަކު ހައްޔަރުކޮށްފައެއް ނުވެ އެވެ.
މިމައްސަލަ އިތުރަށް ތަހުގީގުކުރަމުންދާ ކަމަށްވެސް ފުލުހުން ބުނެފައިވެ އެވެ.
ފުލުހުންގެ ތަފާސްހިސާބުތަކަށް ބަލާއިރު މިދިޔަ އަހަރުގެ ފަހުކޮޅުން ފެށިގެން މި އަހަރުގެ މިހާތަނަށް މަކަރާއި ހީލަތް ހަދައިގެން 27 މިލިއަނަށް ވުރެ ގިނަ ރުފިޔާ ވަނީ އެކި މީހުންގެ އެކައުންޓްތަކުން ނަގާފަ އެވެ. އެހެންވެ ސްކޭމް ކޯލްތަކަށް ސަމާލުވުމަށް ފުލުހުން ގެންދަނީ އަބަދާއަބަދު އިލްތިމާސްކުރަމުންނެވެ.
