ކ. ފުނަދޫގައި ހުރި ތެޔޮ ޓޭންކްތައް އެހެން ތަނަކަށް ބަދަލުކުރުމުގެ މަސައްކަތް 18 މަސް ދުވަހުގެ ތެރޭގައި ނިންމަން ޗައިނާ ކޮންޓްރެކްޓަރަކާ ހަވާލުކޮށްފި އެވެ.
ވެލާނާ އިންޓަނޭޝަނަލް އެއާޕޯޓް ތަރައްގީކުރުމަށް މި ސަރުކާރުން އެކުލަވާލި ޕްލޭންގައި ކ. ފުނަދޫގައި ހުރި ފިއުލްފާމް އެހެން ތަނަކަށް ބަދަލުކޮށް ފުނަދޫ ސްޕެޝަލް އިކޮނޮމިކް ޒޯނަކަށް ހަދައި އެ ރަށުގައި ބައިނަލްއަގުވާމީ ފައިނޭންޝަލް ސެންޓަރެއް ތަރައްގީކުރުމަށް ވަނީ ނިންމާފަ އެވެ.
އެ ގޮތުން ފުނަދޫގައި ހުރި ފިއުލްފާމްތައް ކ. މާގިރިފަޅަށް ބަދަލުކުރަން ވަނީ ނިންމާފަ އެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވި ގޮތުގައި ފިއުލްފާމް ބަދަލުކުރުމުގެ މަސައްކަތް ހަވާލުކުރީ ޗައިނާގެ ކޮންޓްރެކްޓަރަކާ އެވެ.
"އެސްޓީއޯ އިން މައުލޫމާތު ދޭ ގޮތުގައި ޗައިނާގެ މި ކަމަށް ވަރަށް ފުންނާބުއުސް ކޮންޓްރެކްޓަރަކާ އެކަން ހަވާލުކޮށްފަ ވާނީ،" ސައީދު ވިދާޅުވި އެވެ.
ސައީދު ވިދާޅުވީ ފިއުލްފާމް ބަދަލުކުރާތަން ހިއްކާ އެތަނުގައި ބޮޑުހިލަ ޖެހުމާއި ފިއުލްފާމްގެ ޓޭންކްތައް ހެދުމަށް 18 މަސްދުވަސް ހޭދަވާނެ ކަމަށާއި އެ މަސައްކަތް މިހާރު ކުރިއަށްދާ ކަމަށެވެ.