ގްރީން ފަންޑުން މި އަހަރުގެ ފުރަތަމަ ތިން މަސް ދުވަހުގެ ތެރޭގައި 114 މިލިއަން ރުފިޔާ ހޭދަކޮށްފި އެވެ.
ފިނޭންސް މިނިސްޓްރީން އާންމުކުރި ގްރީން ފަންޑު ރިޕޯޓުގައިވާ ގޮތުން މި އަހަރުގެ ޖެނުއަރީ މަހު ގްރީން ފަންޑުން 138،907 ރުފިޔާ ހޭދަކޮށްފައިވެ އެވެ. ފެބްރުއަރީ މަހު 93.9 މިލިއަން ރުފިޔާ އަދި މާޗް މަހު 19.8 މިލިއަން ރުފިޔާ މި ފަންޑުން ހޭދަކުރި އެވެ.
ގްރީން ފަންޑަށް މި އަހަރުގެ ފުރަތަމަ ތިން މަސް ދުވަހުގެ ތެރޭގައި 316 މިލިއަން ރުފިޔާ ޖަމާވެފައިވެ އެވެ.
މީގެ ތެރޭގައި މި ފަންޑަށް މާޗް މަހު ލިބުނު 113.8 މިލިއަން ރުފިޔާ ހިމެނެ އެވެ. މާޗް މަހު މި ފަންޑަށް އެންމެ ބޮޑު އާމްދަނީއެއް ލިބުނީ ކ. އަތޮޅުންނެވެ. މާޗް މަހު ކ. އަތޮޅުން މި ފަންޑަށް 36 މިލިއަން ރުފިޔާ ލިބުނެވެ.
މި ފަންޑުން މާޗްމަހު ހޭދަކޮށްފައިވާ މަޝްރޫއުތަކުގެ ތެރޭގައި ފެނާއި ނަރުދަމާގެ މަޝްރޫއުތަކާއި ގޮނޑުދޮށް ހިމާޔަތްކުރުމުގެ މަޝްރޫއުތައް ހިމެނެ އެވެ.
ގްރީން ފަންޑުގައި މާޗް މަހުގެ ނިޔަލަށް ހުރީ 1.3 ބިލިއަން ރުފިޔާ އެވެ.
ރާއްޖޭގެ ތިމާވެށި ހިމާޔަތްކުރުމުގެ އެކި މަސައްކަތްތަކަށް ފައިސާ ހޯދުމަށް ގްރީން ޓެކްސް ނަގަން ފެށީ އޮކްޓޯބަރު 2016 އިން ފެށިގެންނެވެ.
ގްރީން ޓެކުހަކީ ރާއްޖޭގައި ހިންގާ ޓޫރިސްޓު ރިޒޯޓުތަކާއި ހޮޓާތަކާއި ގެސްޓްހައުސްތަކުގެ އިތުރުން ޓޫރިސްޓް އުޅަނދުތަކަށް އަންނަ ފަތުރުވެރިންގެ އަތުން ނެގޭ ޓެކުހެކެވެ.