މި ސަރުކާރުން އެއްވެސް ފުލުހެއްގެ މައްޗަށް ވަކި މީހަކާއި ދޭތެރޭ ވަކި ގޮތަކަށް އަމަލުކުރުމަށް ނުފޫޒު ނުފޯރުވާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ދިވެހި ފުލުހުންގެ ހިދުމަތުގެ ކުރިއަށް އޮތް ފަސް އަހަރުގެ ސްޓްރެޓެޖިކް ޕްލޭން އިފްތިތާހުކުރުމަށް ބޭއްވި ރަސްމިއްޔާތުގައި މިނިސްޓަރު އިހުސާން ވިދާޅުވީ މީހެއްގެ ހައިސިއްޔަތުން ސަރުކާރުން ފުލުހުންގެ މައްޗަށް ނުފޫޒު ނުފޯރުވާނެ ކަމަށެވެ.
"ގާނޫނާއި ފުށުއަރާ ހިނދުގައި އޭނާއަކީ ދައުލަތުގެ ވަޒީރެއްތޯ. މަޖިލީހުގެ މެންބަރެއްތޯ. އޭނައަކީ މިވެނި ހައިސިއްޔަތެއްގެ މީހެއްތޯ. މި އެއް ބެލުމެއް ނޯންނާނެ،" އިހުސާން ވިދާޅުވި އެވެ.
ކުށް ކުރުމަށް ސަރުކާރުން އެއްވެސް ވަރަކަށް ފުރުސަތު ނުދޭނެ ކަމަށާއި ސަރުކާރުން މަސައްކަތް ކުރަނީ ކުށްކުރުން ހުއްޓުވުމަށް ކަމަށް އޭނާ ވިދާޅުވި އެވެ.
ފުލުހުންގެ މުއައްސަސާއަށް ދައުލަތުގެ ބަޖެޓުން އަހަރަކު ދެ ބިލިއަން ރުފިޔާ ހަރަދުކުރާކަން ފާހަގަކުރައްވާ މިނިސްޓަރު އިހުސާން ވަނީ އެވަރުގެ ހޭދައެއް ކުރާއިރު ދައުލަތާއި ރައްޔިތުންގެ ބޮޑެތި އުންމީދުތަކެއް ހުންނާނެ ކަމަށް ވިދާޅުވެފަ އެވެ.
އެއީ ނަތީޖާ ނެރުން ކަމަށް މިނިސްޓަރު އިހުސާން ވިދާޅުވި އެވެ.