އެމްޓީސީސީގެ ހިއްސާދާރުންނަށް 2022 ވަނަ އަހަރުގެ ހިއްސާގެ ފައިދާގެ ގޮތުގައި ފަސް ރުފިޔާގެ މޫނުމަތީ އަގުގެ ކޮންމެ ހިއްސާއަކަށް ހަތަރު ރުފިޔާ އަލުން ދޭން ފާސްކޮށްފި އެވެ.
އެ ގޮތަށް ފާސްކުރީ އިއްޔެ ބޭއްވި އެމްޓީސީސީގެ ހާއްސަ އާންމު ޖަލްސާގަ އެވެ. "ފަހިވޯޓު" މެދުވެރިކޮށް ބޭއްވި މި ޖަލްސާގައި އެމްޓީސީސީގެ 47 ހިއްސާދާރުން ބައިވެރިވި ކަމަށް އެމްޓީސީސީން ބުނެ އެވެ.
އެމްޓީސީސީ އިން ބުނި ގޮތުގައި މި ނިންމުމަކީ ކުންފުނީގެ ހިއްސާދާރުންނަށް 2022 ވަނަ އަހަރު ހިއްސާގެ ފައިދާ އަލުން ދިނުމަށް ޖަލްސާއެއް ބާއްވާނެ ކަމަށް ކުރީގެ ޑިރެކްޓަރުންގެ ބޯޑުގެ ރިޔާސަތުން ވިދާޅުވެފައިވާތީ ކުންފުނީގެ މިހާރުގެ ޑިރެކްޓަރުންގެ ބޯޑުން އެ ނިންމުމަށް އިހުތިރާމުކޮށް ހިއްސާދާރުންނަށް ހިއްސާގެ ފައިދާއަށްވާ ފައިސާ ދިނުމުގެ ގޮތުން މި ޖަލްސާއަށް ހުށަހެޅި ހުށަހެޅުމެކެވެ.
މި ޖަލްސާގައި އެމްޓީސީސީ އިން ވަނީ އެކުންފުނީގެ އަސާސީ އަދި ހިންގާ ގަވާއިދަށް ހުށަހަޅާފައިވާ އިސްލާހުތައް ހިއްސާދާރުންގެ ތާއީދާއެކު ފާސްކޮށްފަ އެވެ.
ޓެކުހަށް ކެނޑުމަށްފަހު 2022 ވަނަ އަހަރު އެމްޓީސީސީއަށް ސާފު ފައިދާގެ ގޮތުގައި 196 މިލިއަން ރުފިޔާ ލިބުނެވެ.