ރާއްޖެއަށް މިދިޔަ ޖޫން މަހު 123،281 ފަތުރުވެރިން ޒިޔާރަތްކޮށްފި އެވެ.
މޯލްޑިވްސް އިމިގްރޭޝަނުން އާންމުކޮށްފައިވާ ތަފާސްހިސާބުތައް ދައްކާ ގޮތުން މިއީ މިދިޔަ އަހަރުގެ ޖޫން މަހު ރާއްޖެއަށް ޒިޔާރަތްކުރި 120،363 ފަތުރުވެރިންނަށްވުރެ 2.42 ޕަސެންޓް އިތުރު އަދަދެކެވެ.
ރާއްޖެއަށް މިދިޔަ މަހު އެންމެ ގިނައިން ފަތުރުވެރިން ޒިޔާރަތްކުރީ ޗައިނާއިންނެވެ. އެ ގައުމުން 20،036 ފަތުރުވެރިން ޒިޔާރަތްކޮށްފައިވާއިރު ރަޝިއާއިން 14،865 ފަތުރުވެރިން ޒިޔާރަތްކޮށްފައިވެ އެވެ.
އިންޑިއާއިން މިދިޔަ މަހު ރާއްޖެ އައީ 10،018 ފަތުރުވެރިންނެވެ. މީގެ އިތުރުން އިނގިރޭސިވިލާތުން 8،261 ފަތުރުވެރިން އަދި ޖަރުމަނުން 5،811 ފަތުރުވެރިން މިދިޔަ މަހު ރާއްޖެ އައިސްފައިވެ އެވެ.
ރާއްޖެއަށް މިދިޔަ މަހު އެވަރެޖްކޮށް ދުވާލަކު 4،109 ފަތުރުވެރިން ޒިޔާރަތްކޮށްފައިވެ އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މި އަހަރުގެ ފުރަތަމަ ހަ މަސް ދުވަހުގެ ތެރޭގައި ރާއްޖެއަށް އެއް މިލިއަނަށްވުރެ ގިނަ ފަތުރުވެރިން ޒިޔާރަތްކުރި އެވެ. މިއީ މިދިޔަ އަހަރުގެ ފުރަތަމަ ހަ މަސް ދުވަހުގެ ތެރޭގައި ޒިޔާރަތްކުރި ފަތުރުވެރިންނަށްވުރެ ނުވަ ޕަސެންޓް އިތުރުވުމެކެވެ.