ކުރީގެ ނައިބު ރައީސް އަހުމަދު އަދީބު އަބްދުލް ގައްފޫރް ދޫނިދޫއަށް ބަދަލުކޮށްފި އެވެ. އަދީބު ކުރިން ހުންނެވީ މާފުށީ ޖަލުގަ އެވެ. އަދީބު ދޫނިދޫއަށް ބަދަލުކޮށްފައިވަނީ ރޭގެ ވަގުތެއްގަ އެވެ.
ފުލުހުންގެ އިންފޮމޭޝަން އޮފިސަރު މިއަދު ވިދާޅުވީ، އަދީބު ރޭގެ ވަގުތެއްގައި ދުނިދޫއަށް ބަދަލުކޮށްފައިވާ ކަމަށެވެ.
ގިނަ ދައުވާތަކެއް އުފުލާފައިވާ އަދީބު އެންމެ ފުރަތަމަ ހުންނެވީ ވެސް ދޫނިދޫގަ އެވެ. އަދީބު މާފުށީ ޖަލަށް ބަދަލުކޮށްފައިވަނީ ކްރިމިނަލް ކޯޓުން އަދީބުގެ މައްޗަށް ހިންގާ ޝަރީއަތް ނިމެންދެން ހޯމް މިނިސްޓްރީ ކަނޑައަޅާ ތަނެއްގައި ބަންދު ކުރުމަށް އަމުރު ކުރުމުންނެވެ. ހޯމް މިނިސްޓްރީން ކަނޑައަޅާފައިވަނީ ޝަރީއަތް ނިމެންދެން އަދީބު މާފުށީ ޖަލުގައި ބެހެއްޓުމަށެވެ.
ފުލުހުންގެ ހައްޔަރުގައި ދޫނިދޫގައި ހުރި އަދީބު ވަނީ، އާއިލާއާ ބައްދަލުވުންތަކުގައި ތަފާތުކުރުންތައް ގެންގުޅޭ ކަމަށް ބުނެ ސިވިލް ކޯޓަށް މައްސަލައެއް ވައްދާފައެވެ. އެ މައްސަލައިގެ ޝަރީއަތް ހިންގުމަށް މިހާރު ނިންމާފައިވާއިރު ޝަރީއަތް ފެށުމުގެ ކުރިން ބޭއްވި ބައްދަލުވުމެއްގައި އަދީބު ވަނީ ދޫނިދޫ ގޮޅީގައި ނިދަންޖެހޭ ގޮތާމެދު ހިންމަނުޖެހުން ފާޅުކޮށްފައެވެ. އެގޮތުން ދެ ފޫޓު އަށްޓެއްގެ މަތީ ނިދަން ޖެހުމުން އުނދަގޫވާ ކަމަށް އަދީބު ވިދާޅުވި އެވެ.
އަދީބުގެ ގިނަ މައްސަލަތަކެއް ދައުވާކުރަން ފޮނުވައި، އަދި ދައުވާ އުފުލާފައިވާއިރު ޝަރީއަތް ފަށާފައިވަނީ ތިން މައްސަލައެއްގައެވެ. އެއީ މާލެ އަތޮޅު ފަޅެއް ގަވާއިދާ ހިލާފަށް ދޫކޮށްފައިވާ މައްސަލައަކާއި މޭޑޭ މުޒާހަރާގައި އަދީބު ފިސްތޯލައެއް ގެންގުޅުން ކަމަށް ބުނާ މައްސަލާ އާއި އެމްއެމްޕީއާރްސީގެ ހިޔާނާތުގެ މައްސަލައެކެވެ.
ކޯޓަށް ހާޒިރުކުރުމަށްފަހު އަދީބު މާފުއްޓަށް ގެންދަނީ -- އަވަސް ފައިލް ފޮޓޯ