ދިވެހިރާއްޖޭގައި ބިދޭސީން ވަޒީފާ އަދާކުރުމަށްޓަކައި އެއް ގައުމަކުން އެންމެ ގިނައިން ރާއްޖެއަށް ގެނެވޭނެ އަދަދަކީ އެއްލައްކަ މީހުން ކަމަށް ވަޒީފާއާ ބެހޭ ގާނޫނުގައި ކަނޑައަޅާފައި އޮތް އޮތުން އުވާލައި އެ އަދަދު ކަނޑައެޅުމުގެ ބާރު ގަވާއިދެއްގެ ދަށުން ކަމާގުޅޭ ވަޒީރަށް ދިނުމަށް ގާނޫނަށް އިސްލާހު ހުށަހަޅައިފި އެވެ.
ސަރުކާރުގެ ފަރާތުން ގާނޫނަށް މި އިސްލާހު ހުށަހެޅުއްވީ ކުޅުދުއްފުށި އުތުރު ދާއިރާގެ މެންބަރު މުހައްމަދު ދާއޫދު އެވެ.
ވަޒީފާއާ ބެހޭ ގާނޫނުގެ 1-65 ވަނަ މާއްދާގެ (ހ) ގައި މިހާރު އޮތް ގޮތުން ރާއްޖޭގައި ބިދޭސީން ވަޒީފާ އަދާކުރުމަށްޓަކައި އެއް ގައުމަކުން އެންމެ ގިނައިން ރާއްޖެއަށް ގެނެވޭނީ އެއް ލައްކަ މީހުންނެވެ.
އެ މާއްދާއަށް ހުށަހެޅި އިސްލާހުގައިވާ ގޮތުން ވަޒީފާ އަދާކުރަން ރާއްޖެއަށް ބިދޭސީން ގެނެވޭނެ އަދަދާއި ދާއިރާތައް ކަނޑައަޅާނީ ގާނޫނުގެ ދަށުން ހަދާ ގަވާއިދުގެ ދަށުންނެވެ.
އެ ގޮތުން ބިދޭސީން ގެނެވޭނެ އަދަދުތަކާއި ދާއިރާތައް ކަނޑައެޅުމުގައި އަހަރެއްގެ ތެރޭގައި ރާއްޖެއަށް ބިދޭސީން ގެނެވޭނެ އަދަދާއި ދާއިރާތަކާއި އެއް ގައުމަކުން އެންމެ ގިނައިން ބިދޭސީން ގެނެވޭނެ އަދަދާއި ދާއިރާތައް ކަނޑައެޅިގެންދާނެ ކަމަށް އެ މާއްދާގެ (ށ) އަށް ހުށަހެޅި އިސްލާހުގައި ބުނެފައިވެ އެވެ.
އެފަދައިން ކަނޑައެޅުމުގައި އެކިއެކި ސިނާއަތްތަކާއި މަސައްކަތުގެ ބާވަތަށް އަދި ހުނަރުގެ މިންވަރަށް ބިނާކޮށް ތަފާތު ގިންތިތަކަކަށް ތަފާތު މިންގަނޑުތައް ކަނޑައެޅިދާނެ ކަމަށް އިސްލާހުގައި ބުނެފައިވެ އެވެ.
އިސްލާހުގައިވާ ގޮތުން މި އަދަދު ކަނޑައަޅަންވާނީ ރާއްޖޭގައި ބިދޭސީން ވަޒީފާ އަދާކުރުމުގެ ސަބަބުން ރާއްޖޭގެ ވަޒީފާގެ ބާޒާރަށް ކުރާނެ އަސަރު ދެނެގަތުމަށްޓަކައި ހަދާ އެސެސްމަންޓަކަށްފަހު ވަޒީރުންގެ މަޖިލީހުގެ ލަފާގެ މަތިންނެވެ.
މި އެސެސްމަންޓުގައި ރާއްޖޭގެ ވަޒީފާގެ ބާޒާރުގައި ހުރި ގޮންޖެހުންތަކާއި މުހިންމު ދާއިރާތަކަށް ބިދޭސީން ބޭނުންވާ މިންވަރާއި ރާއްޖޭގައި އެހާތަނަށް ބިދޭސީން ވަޒީފާ އަދާކުރަމުންދާ މިންވަރާއި ގަވާއިދާ ހިލާފަށް މަސައްކަތްކުރާ ބިދޭސީންގެ މިންވަރު ދެނެގަންނަންވާނެ ކަމަށް އިސްލާހުގައިވެ އެވެ.
ގާނޫނަށް ހުށަހަޅާފައިވާ މި އިސްލާހުތަކާމެދު އިދިކޮޅު އެމްޑީޕީގެ މެންބަރުން ވަނީ ކަންބޮޑުވުން ފާޅުކޮށްފަ އެވެ.
ވަޒީފާއާ ބެހޭ ގާނޫނަށް ހުށަހެޅި އިސްލާހުގައި ބިދޭސީ މަސައްކަތްތެރިން ރާއްޖެ ގެނައުމަށްފަހު އޭނައާމެދު އިހުމާލުވެއްޖެނަމަ ވަޒީފާދޭ ފަރާތް 50،000 ރުފިޔާއިން ޖޫރިމަނާކުރަންވެސް ހިމަނާފައިވެ އެވެ.