ޝަރީއަތުގައި ހަޑި ހުތުރު ބަހުން ވާހަކަ ދެއްކި މީހަކު ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.
ޝަރީއަތުގައި ހަޑި ހުތުރު ބަހުން ވާހަކަ ދެއްކި މީހަކީ ބަންދު މަޖިލީހަކަށް މިއަދު ހާޒިރު ކުރި މީހެކެވެ.
މަސްތުވާތަކެތީގެ މައްސަލައެއްގައި ހައްޔަރުކޮށްގެން ކޯޓަށް ގެނައި މި މީހާއަކީ ގދ. ތިނަދޫ ސްކޫނަ އަލީ ޝަމްމާހް ވަހީދު އެވެ. އޭނާގެ އުމުރަކީ 29 އަހަރެވެ.
މިއަދު އޮތް ބަންދު މަޖިލީހަށް އޭނާ ހާޒިރުކުރުމުން ޝަރީއަތުގައި ހަޑި ހުތުރު ބަހުން އޭނާ ވާހަކަ ދައްކާތީ އެކަން އެގޮތަށް ނުކުރުމަށް ތަކުރާރުކޮށް އެންގުމުންވެސް އޭނާ އެކަން ނުހުއްޓުވުން، ގާޒީ ހުކުމް ކުރެއްވީ އޭނާ 30 ދުވަހަށް ޖަލަށް ލާށެވެ. އެއީ ޝަރީއަތުގެ ނިޒާމާ ހިލާފުވެގެން، ގާޒީ އާއިޝަތު ނުޒުހާ ކުރެއްވި ހުކުމެކެވެ.
އޭނާގެ މައްޗަށް ތުހުމަތު ކުރެވުނު މަސްތުވާތަކެތީގެ މައްސަލައިގައި އޭނާ ބަންދު ކުރަން އަމުރު ކުރީ، 15 ދުވަހަށެވެ. އެހެންކަމުން ޖުމްލަ 45 ދުވަހު އޭނާ ބަންދުގައި ހުންނާނެ އެވެ. ރިކޯޑްތަކުން އެނގޭ ގޮތުގައި މި މީހާއަކީ ކުރިންވެސް ކުށުގެ ރެކޯޑް އޮންނަ މީހެކެވެ.