ސިއްހީ ދާއިރާއާ ގުޅުންހުރި ހަރަދުތަކުގެ ގޮތުގައި އެސްޓީއޯއަށް ދައްކަންޖެހޭ ގާތްގަނޑަކަށް 300 މިލިއަން ރުފިޔާ މި ސަރުކާރު ވެރިކަމާ ހަވާލުވިއިރު ހުރި ކަމަށް ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ހަލީލް ވިދާޅުވީ ހޮސްޕިޓަލްތަކާއި ސިއްހީ މަރުކަޒުތަކުން މެޑިކަލް ކޮންސިއުމަބަލްސް ހުސްވުމަކީ އަބަދުވެސް ދިމާވާ ކަމެއް ކަމަށެވެ. ނަމަވެސް މެޑިކަލް ކޮންސިއުމަބަލްސް ހުސްނުވެ ފޯރުކޮށްދިނުމަށް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
"އަޅުގަނޑުމެން ސަރުކާރާ ހަވާލުވިއިރުގައި އެސްޓީއޯއަށް ދައްކަންޖެހޭ ގާތްގަނޑަކަށް 300 އެއްހާ މިލިއަން ރުފިޔާ އޮތް، ކޮންސިއުމަބަލްސް، ރިއެޖެންސްޓްސް އަދިވެސް އެހެން ސިއްހީ ދާއިރާއާ ގުޅުންހުރި ބައެއް ހަރަދުތަކުގެ،" ހަލީލް ވިދާޅުވި އެވެ.
އެ އަދަދުގެ ތެރެއިން ބޮޑުބައެއް އަދާކޮށްފައިވާ ކަމަށް ހަލީލް ވިދާޅުވި އެވެ. އެކަމުގެ ސަބަބުން މެޑިކަލް ކޮންސިއުމަބަލްސް ފޯރުކޮށްދިނުމުގައި އެސްޓީއޯއަށް ލުއި ފަސޭހަވެފައިވާ ކަމަށް އޭނާ ވިދާޅުވި އެވެ.
ހަލީލް ވިދާޅުވީ މެޑިކަލް ކޮންސިއުމަބަލްސް މެދުނުކެނޑި ފޯރުކޮށްދިނުމަށް މަސައްކަތް ކުރަމުންދާ ކަމަށާއި އެ ގޮތުން ރަށްރަށުގެ ހޮސްޕިޓަލްތަކާއި ސިއްހީ މަރުކަޒުތަކުގައި މެޑިކަލް ކޮންސިއުމަބަލްސް ހުރި އަދަދު ދެނެގަތުމަށް ސޮފްޓްވެއާއެއް ތައްޔާރުކުރަމުންދާ ކަމަށެވެ.
"އެ ސޮފްޓްވެއާގެ ތެރެއިން އަޅުގަނޑުމެންނަށް އެނގިގެންދާނެ ރަށްރަށުގައި ކޮންސިއުމަބަލްސް ހުރި އަދަދު،" ހަލީލް ވިދާޅުވި އެވެ.
އެއާއެކު ހޮސްޕިޓަލްތަކާއި ސިއްހީ މަރުކަޒުތަކަށް ފޮނުވަންޖެހޭ ތަކެތި އެނގި އެތަކެތި ފޯރުކޮށްދިނުމަށް ފަސޭހަވެގެންދާނެކަން ހަލީލް ފާހަގަކުރެއްވި އެވެ.
