ސޮއިކޮށްފައިވާ ތަރައްގީގެ މަޝްރޫއުތައް -- ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫއުތަކުގެ އަގު 36 ބިލިއަން ރުފިޔާއަށްވުރެ އިތުރު ކަމަށާއި ނަމަވެސް އެ މަޝްރޫއުތަކަށް މި އަހަރަށް ލިބިފައިވަނީ ފަސް ބިލިއަނަށްވުރެ ކުޑަ އަދަދެއް ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު މުއްތަލިބް ވިދާޅުވީ 36.8 ބިލިއަން ރުފިޔާގެ ޕީއެސްއައިޕީ މަޝްރޫއުގައި ސޮއިކޮށްފައިވާ ކަމަށެވެ.
"މަސައްކަތް ފެށިފައި ހުރި މަޝްރޫއުތަކަކީ (ސާވޭ މަސައްކަތްތަކާއެކު) 31.5 ބިލިއަން ރުފިޔާ. އަޅުގަނޑުމެންނަށް ލިބިފައި އިނީ ފަސް ބިލިއަނަށްވުރެ ކުޑަ އަދަދެއް މި އަހަރު،" މުއްތަލިބް ވިދާޅުވި އެވެ.
ބަޖެޓު އޮތް ގޮތުން މަޝްރޫއުތައް ކުރިއަށް ގެންދަންޖެހެނީ ޕްރައޮޓައިޒް ކޮށްގެން ކަމަށްވެސް މިނިސްޓަރު ވިދާޅުވި އެވެ.
މުއްތަލިބް ވަނީ މަޝްރޫއުތައް ކުރިއަށް ގެންދެވޭނެ ވަރަށް ބަޖެޓުގައި ފައިސާ ހިމަނައިދިނުމަށް މަޖިލީހުގެ މެންބަރުންގެ ކިބައިން އެދިވަޑައިގެންފަ އެވެ.
މިނިސްޓަރު މިހެން ވިދާޅުވިއިރު މިއަހަރުގެ ދައުލަތުގެ ބަޖެޓުގައި ޕީއެސްއައިޕީ މަޝްރޫއުތަކަށް އަށް ބިލިއަނަށްވުރެ ގިނަ ރުފިޔާ ހިމަނާފައިވެ އެވެ.
