ދިވެހިރާއްޖޭގައި ވަޒީފާ އަދާކުރާ ބިދޭސީންނާ ގުޅޭ ހުއްދަތަކަށް ގާނޫނާއި ގަވާއިދުގެ ދަށުން ދައުލަތަށް ދައްކަންޖެހޭ ފީތަކާއި ޖޫރިމަނާތަކުގެ އަދަދު އެއް ލައްކަ ރުފިޔާ އަށްވުރެ އިތުރުވާ ވަޒީފާދޭ ފަރާތްތަކުގެ މައުލޫމާތު އާންމުކުރި ފަހުން 182 މިލިއަނަށްވުރެ ގިނަ ރުފިޔާ ދައްކާފައިވާ ކަމަށް ހޯމްލޭންޑް ސެކިއުރިޓީ މިނިސްޓްރީން ބުނެފި އެވެ.
ބިދޭސީންގެ ފީ އަދި ޖޫރިމަނާ ނުދައްކާ ފަރާތްތަކުގެ ނަންތައް ހޯމްލޭންޑް ސެކިއުރިޓީ މިނިސްޓްރީން އާންމުކުރީ މިދިޔަ ޖުލައި މަހު އެވެ.
އެކްސްޕެޓް ހިދުމަތް ހޯދާ ވަޒީފާދޭ ފަރާތްތަކުން ދައުލަތަށް ދައްކަންޖެހޭ ފައިސާގެ ތެރެއިން، ފައިސާ ނުދައްކާ ފަރާތްތަކުގެ ލިސްޓު އާއްމު ކުރި ފަހުން 182.95 މިލިއަން ރުފިޔާ ރިކަވާ ކުރެވިފައިވާކަން ހޯމްލޭންޑް ސެކިއުރިޓީ މިނިސްޓްރީން ރޭ ހާމަކުރީ އެކްސްގައި ކުރި ޕޯސްޓެއްގަ އެވެ.
ބިދޭސީންގެ ފީ އާއި ޖޫރިމަނާ ނުދައްކާ ފަރާތްތަކުގެ ލިސްޓު އާއްމުކުރުމަށްފަހު އެ ފައިސާ މިމަހުގެ 12 ވަނަ ދުވަހުގެ ކުރިން ދެއްކުމަށް ހޯމްލޭންޑް ސެކިއުރިޓީ މިނިސްޓްރީން އެންގި އެވެ.
އެ ފައިސާ ނުދައްކައިފިނަމަ، އެ ފަރާތްތަކަށް އެކްސްޕެޓް ސިސްޓަމް މެދުވެރިކޮށް ހުއްދަ ދިނުން ހުއްޓާލާނެ ކަމަށްވެސް މިނިސްޓްރީން ބުންޏެވެ.
ހޯމްލޭންޑް ސެކިއުރިޓީ މިނިސްޓްރީން އާއްމު ކުރި ލިސްޓުގައި 1،000 އަށްވުރެ ގިނަ ފަރާތް ހިމެނެ އެވެ. މީގެތެރޭގައި ރާއްޖޭގެ ބޮޑެތި ވިޔަފާރި ކުންފުނިތައްވެސް ހިމެނެ އެވެ. އަދި ސިޔާސީ ފަރާތްތަކުގެ މަސްލަހަތު ހިމެނޭ އެތައް ކުންފުންޏެއްވެސް މި ލިސްޓުގައި ހިމެނެ އެވެ.
ލިސްޓުން އެނގޭ ގޮތުގައި ބައެއް ކުންފުނިތަކުން އެތައް މިލިއަން ރުފިޔާއެއް ދައުލަތަށް ދައްކަން އެބަހުއްޓެވެ.