އައްޑޫ ސިޓީ ޕޮލިސް ސްޓޭޝަނެއްގައި ބައިންދައިފައި އިންދައި ފިލައިގެން ދިޔަ މީހަކު، ހަތް މަސް ދުވަހަށް ޖަލަށްލުމަށް ހުކުމްކޮށްފި އެވެ.
މިއީ މަސްތުވާތަކެތީގެ މައްސަލައަކާ ގުޅިގެން ފުލުހުން ހިންގި އޮޕަރޭޝަނެއްގައި 2021 ވަނަ އަހަރުގެ ކުރީކޮޅު ހައްޔަރު ކުރި މީހެއްގެ މައްސަލަ އެކެވެ.
ފުލުހުންނަށް ލިބުނު އިންޓެލިޖެންސް މައުލޫމާތަކާ ގުޅިގެން، ކޯޓު އަމުރެއްގެ ދަށުން ހައްޔަރުކޮށްފައިވާ އައްޑޫ ސިޓީއަށް ނިސްބަތްވާ ދިވެހި ފިރިހެނަކު، އެ ދުވަހުގެ ހެނދުނު އައްޑޫ ގަން ޕޮލިސް ސްޓޭޝަނަށް ގެނެސް އެތާ ބައިންދާފައި އިންދައި އޭނާ ފިލީ އެ ދުވަހު ހަވީރު އެވެ.
މި މީހާގެ މައްޗަށް ދައުލަތުން އުފުލާފައިވަނީ ޖިނާއީ ބަންދަކުން ފިލުމުގެ ކުށުގެ ދައުވާ އެވެ.
މި މައްސަލައިގެ ޝަރީއަތުގައި އޭނާ ވަކީލަކު ހޯދަން އެދުމުން އެ ފުރުސަތު ދިން ނަމަވެސް އޭނާއަށް ވަކީލަކު އައްޔަން ކުރެވޭނެ މާލީ ތަނަވަސްކަން ނެތް ކަމަށް ބުނެ އަދި ކުށަށް އަމިއްލައަށް އިއުތިރާފުވެފައިވާތީ މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލައެއްގެ ގޮތުގައެވެ.
މި ކުށުގެ އަސާސީ އަދަބަކީ ނުވަ މަހާއި 18 ދުވަހުގެ ޖަލު ހުކުމެކެވެ. ނަމަވެސް ދައުވާ ރައްދުވާ މީހާ ކުށަށް އިއުތިރާފުވެ އަވަސް ނިޔާގެ މައްސަލައެއްގެ ގޮތުގައި ކުރިއަށް ގެންދިޔުމުން އޭނާއަށް ވަނީ އަދަބުން ކޮންމެވެސް މިންވަރެއް ލުއިކޮށްދީފަ އެވެ. އޭނާގެ މައްޗަށް ޝަރީއަތުން ހުކުމް ކުރީ، ހަތް މަހާއި ހަ ދުވަހުގެ ޖަލު ހުކުމެކެވެ.