ރައީސް އަބްދުﷲ ޔާމީން އަބްދުލް ގައްޔޫމް އަވަހާރަކޮށްލަން އެމަނިކުފާނު ދަތުރުކުރައްވަމުން ގެންދެވި ލޯންޗްކޮޅަށް ދިން ހަމަލާގެ ތުހުމަތުކުރެވޭ މީހުންގެ މައްޗަށް އަންނަ ހަފުތާގެ ތެރޭގައި ދައުވާ އުފުލާނެ ކަމަށް ޕްރޮސިކިއުޓާ ޖެނަރަލް އައިޝަތު ބިޝާމް ވިދާޅުވެއްޖެ އެވެ.
މި މައްސަލައިގައި ދައުވާކުރަން ޕީޖީއަށް ފޮނުވާފައިވަނީ ކުރީގެ ނައިބު ރައީސް އަހުމަދު އަދީބާއި މައްސަލައިގައި ހައްޔަރު ކުރި ސިފައިންގެ މީހެއް ކަމަށްވާ، އިސްހާގު ހަސަން އާއި އަދީބުގެ ޕާސަނަލް ސެކިއުރިޓީ އޮފިސަރު ސާޖެންޓް އަހްމަދު ރިކާޒްގެ މައްޗަށެވެ. ރިކާޒް އަކީ ރައީސް އޮފީހުގެ މިނިސްޓަރު، މުހައްމަދު މުޖުތާޒުގެ ކޮއްކޮ އެވެ.
ޕީޖީ އޮފީހުގެ އަހަރީ ރިޕޯޓް ނެރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ޕީޖީ ބިޝާމް ވިދާޅުވީ، ރިޔާސީ ލޯންޗްކޮޅުގެ މައްސަލާގައި ދައުވާ ކުރުމަށް ފުލުހުން އެ އޮފީހަށް ފޮނުވާފައިވާ އެންމެންގެ މައްޗަށް ވެސް މި މަހުގެ 15 ވަނަ ދުވަހުގެ ކުރިން ދައުވާ އުފުލައި، ކްރިމިނަލް ކޯޓަށް ފޮނުވާނެ ކަމަށެވެ.
އެނގިފައިވާ ގޮތުގައި އެ މައްސަލައިގައި ހައްޔަރުކޮށްފައި ހުރި ސިފައިންގެ މީހެއް ކަމަށްވާ، ޖަވާޒު ވަނީ ތަހުގީގަށް ގިނަ މައުލޫމާތުތަކެއް ކިޔަދީފަ އެވެ. އެގޮތުން ފިނިފެންމާގައި ހަރުކުރި ބޮން ތައްޔާރުކުރީ އޭނާ ކަމަށާއި އެ ބޮން ހެދީ އަދީބު ދިރިއުޅުއްވި ރެހެންދި ފްލެޓްގައި ކަމަށް އޭނާ ވަނީ ތަހުގީގުގައި އެއްބަސްވެ، އިއުތިރާފް ބަޔާން ދީފަ އެވެ. ފުލުހުން އެ މައްސަލައިގެ ހެކިންގެ ގޮތުގައި ހުށަހަޅާފައި ވަނީ، ޖަވާޒުގެ އިތުރަށް އަދީބު ދިރިއުޅުއްވި ރެހެންދި ފްލެޓްގެ ކާޕެޓްގެ ބައެއް ސާމްޕަލްތަކާއި އެ ފްލެޓްގެ ސީސީޓީވީ ފްޓޭޖްތަކެވެ.
ޖަވާޒް ދީފައިވާ ބަޔާނުގައި، ހިބަޅިދޫ އިން ފެނުނު ހަތިޔާރުތަކާ އެކު ހޯދި އައިއީޑީގެ ބަޔާއި އެހެން ވެސް ބައެއް ތަކެއްޗަކީ ލޯންޗްގައި ހަރުކުރަން އޭނާ ތައްޔާރު ކުރި އެތި ހެދުމުގައި ބޭނުން ކުރި ތަކެތި ކަމަށް އޭނާ ވަނީ އެއްބަސްވެފަ އެވެ.
ލޯންޗްކޮޅުގެ މައްސަލައިގެ އިތުރުން އެމްއެމްޕީއާރްސީގެ ބޮޑު ހިޔާނާތުގެ މައްސަލަތައް ތަހުގީގުކޮށް، އެމީހުންގެ މައްޗަށް ދައުވާކުރުމަށް ފޮނުވާފައިވާ ކަމަށެވެ. މިހާރު އެ މައްސަލަތައް ދިރާސާކުރަމުންދާ ކަމަށެވެ. އަދި އެމްއެމްޕީއާރްސީގެ މައްސަލާގައި 50 ރަށެއްގެ މައްސަލާގައި ދައުވާކުރުމަށް ފޮނުވާފައިވާ ކަމަށް ވެސް ވިދާޅުވި އެވެ.
އެމްއެމްޕީއާރްސީގެ ހިޔާނާތުގެ މައްސަލާގައި މިހާރު ވެސް ކުރީގެ ނައިބު ރައީސް އަދީބާއި އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތު އަދި ހާމިދު އިސްމާއިލް (ހާމިދު ސޭޓް)ގެ މައްޗަށް ވަނީ ދައުވާކޮށް، ޝަރީއަތް ފަށާފަ އެވެ.