ރާއްޖޭގައި ހެލިކޮޕްޓަރުގެ ހިދުމަތް ދިނުމަށް 36 ފަރާތަކުން ޝައުގުވެރިކަން ފާޅުކޮށްފި އެވެ.
ހެލިކޮޕްޓަރުގެ ދަތުރުތައް ކުރަން ބޭނުންވާ ފަރާތްތަކަށް ޓްރާންސްޕޯޓް މިނިސްޓްރީން އެ ފުރުސަތު ހުޅުވާލީ މިމަހުގެ ފަސް ވަނަ ދުވަހު އެވެ.
މި މަސައްކަތުގެ ތެރޭގައި ބަލިމީހުން އުފުލުމަށް ހެލިކޮޕްޓަރު އެއާ އެމްބިއުލާންސް ހިދުމަތް ދިނުމާއި ސާޗް އެންޑް ރެސްކިއު އޮޕަރޭޝަންތައް ދިނުން ހިމެނެ އެވެ. މީގެ އިތުރުން ފަތުރުވެރިކަމުގެ ސިނާއަތަށް ހާއްސަކޮށް ފަތުރުވެރިން އުފުލުންވެސް ހިމެނެ އެވެ.
ހެލިކޮޕްޓަރުގެ ހިދުމަތަށް ހުޅުވާލި ފުރުސަތު މިމަހުގެ 19 ވަނަ ދުވަހަށް ހަމަވެފައިވާއިރު ދައުލަތުގެ މީޑިއާގައި ވާހަކަ ދައްކަވަމުން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވި ގޮތުގައި 36 ކުންފުންޏަކުން ވަނީ ހެލިކޮޕްޓަރުގެ ހިދުމަތް ދޭން ޝައުގުވެރިކަން ފާޅުކޮށްފަ އެވެ.
"ދުނިޔޭގެ އެންމެ ވަރުގަދަ ކުންފުނިތަކުން ކުރިމަތިލި. މިހާރު ކުރިއަށްދަނީ ހިދުމަތްދޭނެ ފަރާތްތައް ހޮވުމަށް ކުރަންޖެހޭ މަސައްކަތްތައް،" އަމީން ވިދާޅުވި އެވެ.
ރާއްޖޭގައި ކުރިން ވިޔަފާރި އުސޫލުން ހެލިކޮޕްޓަރު ދަތުރުތަކުގެ ހިދުމަތް ދިން ނަމަވެސް ރާއްޖޭގައި މިހިދުމަތް ހުއްޓާލީ އޭރު ހިދުމަތް ދިނުމަށް ބޭނުންކުރި ހެލިކޮޕްޓަރުތަކުގެ ސަލާމަތީ ކަންކަމާ މެދު ސުވާލު އުފެދި ހިނގި ނުރައްކާތެރި ހާދިސާއެއްގައި ބަޔަކު މަރުވި ފަހުން 1999 ވަނަ އަހަރު އެވެ. އޭގެފަހުން ރާއްޖޭގައި ހެލިކޮޕްޓަރު ދަތުރުތަކުގެ ހިދުމަތް ވިޔަފާރި އުސޫލުން ދީފައެއް ނުވެ އެވެ. ނަމަވެސް އެމްއެެންޑީއެފް އިން ބަލި މީހުން އުފުލުމަށް އަދި މީހުން ސަލާމަތް ކުރުމުގެ އޮޕަރޭޝަންތަކުގައި ކޮންމެވެސް ވަރަކަށް ހެލިކޮޕްޓަރު ބޭނުންކުރެ އެވެ.