ގަވާއިދާ ހިލާފަށް ބިދޭސީއަކު ޓެކްސީގެ ހިދުމަތް ނުދޭ ކަމަށާއި، ހިދުމަތް ދޭކަމަށް ބުނެ ފަތުރަމުންދާ މައުލޫމާތަކީ ދޮގު މައުލޫމާތު ކަމަށް މޯލްޑިވްސް އިމިގްރޭޝަނުން ބުނެފި އެވެ.
ސޯޝަލް މީޑިއާގައިވަނީ ރެޒިޑެންސް ވިސާ ނެތި އާންމުކޮށް ޓެކްސީ ކުރާ ބިދޭސީއެއް ކަމަށް ބުނެ މީހެއްގެ މައުލޫމާތު ހާމަކޮށްފަ އެވެ.
މި މީހާ ވެލާނާ އިންޓްނޭޝަނަލް އެއާޕޯޓް (ވީއައިއޭ)ގައި ހިފެހެެއްޓުމަށްފަހު ޖޫރިމަނާކޮށް ފުލުހުން އޭނާ ދޫކޮށްލީ ކަމަށްވެސް ސޯޝަލްމީޑިއާގައި ބުނެފައިވެ އެވެ.
ނަމަވެސް އިމިގްރޭޝަނުން ބުނީ އެ މައްސަލަ ފުލުހުން ތަހުގީގުކޮށްފައިވާ ކަމަށާއި އޭނާއަކީ ދިވެއްސަކާއި ކައިވެނިކޮށް، ސައްހަ ރެސިޑެންސް ވިސާ އޮންނަ ފަރާތެއްް ކަމަށެވެ.
"މި ބިދޭސީ ފަރާތަކީ ދިވެއްސަކާއި ކައިވެނިކޮށް، ސައްހަ ރެސިޑެންސް ވިސާ ގެ އިތުރުން ޓެކްސީ ހިދުމަތް ދިނުމުގެ ހުއްދަ އަދި ލައިސަންސް އޮތް ފަރާތެއްކަން ވަނީ ކަށަވަރުކުރެވިފައި،" އިމިގްރޭޝަނުން ބުނެފައިވެ އެވެ.
އިމިގްރޭޝަނުން އަންނަނީ ގަވާއިދާ ހިލާފަށް ވިޔަފާރިކުރާ ބިދޭސީންގެ މައްސަލަތައް ބެލުމަށްފަހު އެމީހުން ޑީޕޯޓްކުރަމުންނެވެ. އެގޮތުން މިހާރު 3000 އަށް ވުރެ ގިނަ ބިދޭސީން ޑީޕޯޓްކޮށްފައިވާ ކަމަށް އިމިގްރޭޝަން ކޮންޓްރޯލާ މުހައްމަދު ޝައްމާން ވަހީދު ވިދާޅުވެފައިވެ އެވެ.
