މޯލްޑިވިއަން އައިޑޮލްގެ ތިންވަނަ ރައުންޑް ކަމަށްވާ ގާލާ ރައުންޑުގެ ތިންވަނަ ޝޯއިން ރ. އުނގޫފާރަށް އުފަން ލަވަކިޔުންތެރިޔާ ފާތިމަތު އަޒްލީމާ ކަޓައިފި އެވެ. އަޒްލީމާ ކަޓާފައިވަނީ ބެލުންތެރިންގެ ވޯޓާއި ޖަޖުންގެ މާކްސް އެއްކޮށްލުމުން އެންމެ ދަށް ނަތީޖާއެއް ލިބިގެންނެވެ. އަޒްލީމާ ކަޓައިގެން ދިޔުމުން ޝޯގައި ދެން ފެންނާނީ އެންމެ އަންހެން ބައިވެރިއެކެވެ. އެއީ ލައިޝާ އެވެ.
އިއްޔެ ރޭ އަޒްލީމާ ހުށަހަޅައިދިނީ "ކަސަބުން ބޯވަޅު" މި ލަވަ އެވެ. އަޒްލީމާ މި ލަވައަށް ޖަޖުންގެ ފަރާތުން ލިބުނީ ގޯސް ކޮމެންޓްތަކެއް ނޫނެވެ. އަޒްލީމާ ކުރިއަރަމުން އަންނަކަން ތިން ޖަޖުން ވެސް ފާހަގަކުރި އެވެ. މިރޭ އަޒްލީމާ ލަވަ ހުށަހަޅައިދީފައިވަނީ އިޝާންއާއެކު އެވެ. ހުށަހަޅައިދިނީ "ހިތް ދެވިއްޖޭ" މި ލަވަ އެވެ.
މީގެކުރިން އަވަސްއަށް ދިން އިންޓަވިއުއެއްގައި އަޒްލީމާ ބުނީ މުބާރާތުން ކަޓައިގެން ދިޔަޔަސް ލަވަކިޔުމާ ދެން ދުރަކަށް ނުދެވޭނެ ކަމަށެވެ. އަމިއްލަ އަލްބަމެއް އެހުންތެރިންނާ ހަމަ އަށް ގެނެސްދިނުމަކީ ވެސް އޭނާގެ އަމާޒެކެވެ.
"މި މުބާރާތުން ކެޓިޔަސް ނުކެޓިޔަސް އިރާދަކުރެއްވިއްޔާ އަޅުގަނޑުގެ ލަވަތައް އަޑުއިވޭނެ. ވަރަށް މަސައްކަތްކުރާނަން އަޅުގަނޑުގެ އަމިއްލަ އަލްބަމެއް ނެރެން ވެސް،" އަޒްލީމާ ބުންޏެވެ.
"ކިޔެވުމަށް ފަހު ބްރޭކްގައި އުޅެނިކޮށް މޯލްޑިވިއަން އައިޑޮލް އިން ފުރުސަތު ލިބުނީ. އެހެން ނޫން ނަމަ މިހާރު އުޅޭނީ ކިޔަވަން ގޮސް. ނާސިން ހަދަން ބޭނުންވަނީ. އަޅުގަނޑުގެ މަންމަ އަކީ ވެސް ނަރުހެއް."
ގާލާ ރައުންޑު ފެށުމާ އެކު މޯލިވިއަން އައިޑޮލް "ހޫނު" ގަދަވެފައިވާއިރު ބެލުންތެރިން އިތުރަށް ނޭވާ ހިފާޓާލާނެ ފަދަ ކަން ކަން ކުރިޔަށް އޮތް ކަމަށް ޕީއެސްއެމް އިން ބުނެ އެވެ. މިހާރުވެސް ގިނަ ދިވެހިންގެ ހިތް އަތުލާފައި ތިބި 8 ބައިވެރިންގެ ތެރެއިން ފަހަރަކު ބައިވެރިޔެއް ކަޓާގެން ދާ އިރު ޝޯ ފިނި ކޮށްލައި ޖަޖުންގެ ގޮތުގައި ސެލެބްރިޓީޒް ވެސް ގާލާ ރައުންޑުގައި ކުރިއަށް ހުރި އެޕިސޯޑުތަކުން ފެންނާނެ އެވެ. އެގޮތުން ފުރަތަމަ ސެލެބްރިޓީ ޖަޖެއްގެ ގޮތުގައި ލަވަކިޔުންތެރިޔާ މީރާ މުހައްމަދު މިރޭގެ ޝޯގައި ވަނީ ބައިވެރިވެފަ އެވެ.
އަންނަ ހަފުތާގެ ހުކުރު ދުވަހުގެ ރޭ ގާލާ ރައުންޑްގެ ފަސްވަނަ ޝޯ ދައްކާނެއިރު ބެލުންތެރިންނަށް ވޯޓު ދިނުމުގެ ފުރުސަތު ޝޯ ފެށުމާއެކު ހުޅުވިގެންދާނެ އެވެ. ހޮނިހިރު ދުވަހު ހަވީރު ހަތަރެއް ޖަހަންދެން ވޯޓް ދިނުމުގެ ފުރުސަތު ލިބޭނެ އެވެ.