މިދިޔަ ރިޔާސީ އިންތިހާބުގައި، އެމްޑީޕީގެ ކެމްޕޭން އޮފީހެއް ހިންގި މެންހެޓަން ބިޒްނަސް ހޮޓަލަށް ވަދެ، ރައްޔިތުންގެ މަޖިލީހުގެ މަރަދޫ ދާއިރާގެ ކުރީގެ މެމްބަރު އިބްރާހިމް ޝަރީފް (މަވޯޓާ)އަށް ހަމަލާ ދިން މީހާއާ އެކު ދައުލަތުން ޑީލެއް ހަދައިފި އެވެ.
މަވޯޓާ ހަމަލާ ދިން ދުވަހު ކުށް ކުރި މީހާ ހައްޔަރުވެސް ކުރި އެވެ.
އެ ހަމަލާ ގުޅިގެން ޝަރީފުގެ އެއް ލޯމައްޗަށް ވަނީ ލޭ އަރައި، ވަރަށް ބޮޑަށް ދުޅަވެފަ އެވެ. އަދި ނޭފަތްމަތި ފަޅައިގެން ގޮސް ލޭ އައިސްފައިވެ އެވެ.
ރިޔާސީ އިންތިހާބުގައި އެމްޑީޕީއާ އެކު މަވޯޓާ ހުންނެވި ނަމަވެސް އިންތިހާބު ނިމުމާއެކު އޭނާ ވަނީ ވެރިކަންކުރާ ޕީއެންސީއާ ގުޅިވަޑައިގެންފަ އެވެ.
މަވޯޓާއަށް ހަމަލާ ދިން މައްސަލައާ ގުޅިގެން ދައުލަތުން ލ. ގަންތުނޑި އުރަހަ އިބްރާހީމް ޔުނައިސް ކިޔާ މީހެއްގެ މައްޗަށް، މީހަކަށް އަނިޔާއެއް ލިބިދާނެ ފަދަ ކުށެއް ކޮށްފާނެ ކަމުގެ ބިރު ދެއްކުމުގެ ދައުވާ އުފުލި އެވެ.
މިމައްސަލައިގައި ޔުނައިސްއާއެކު ދައުލަތުން ހެދި އިއުތިރާފު އެއްބަސްވުމަކާއެކު، މައްސަލަ ކޯޓުގައި ކުރިއަށް ގެންދިޔައީ އަވަސް ނިޔާގެ މައްސަލައެއްގެ ގޮތުގައެވެ.
މައްސަލަ ނިންމައި މިއަދު ހުކުމްކޮށްފައިވާއިރު، މައްސަލަ ނިންމާފައިވަނީ 2،400 ރުފިޔާގެ ޖޫރިމަނާއަކުންނެވެ. އެ މައްސަލައިގެ އަސްލު ހުކުމަކީ ދެ މަހާއި 12 ދުވަހުގެ ޖަލު ހުކުމެކެވެ. އޭގެތެރެއިން މައްސަލައާއި ގުޅިގެން އޭރު ޔުނައިސް ބަންދުކޮށްފައި ބެހެއްޓި މުއްދަތު އުނިކުރުމުން ދެން އޭނާއަށް ބާކީ އޮތީ 12 ދުވަހުގެ ޖަލު ހުކުމެވެ. މި 12 ދުވަސް، އިއުތިރާފުގެ އެއްބަސްވުމަށް ރިއާޔަތްކޮށް ކޯޓުން ޖޫރިމަނާއަކަށް ބަދަލު ކުރީ އެވެ.
ޝަރީފަށް ދިން ހަމަލާގެ އިތުރުން ހަމަ އެދުވަހު ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު މުހައްމަދު ނިހާދަށްވެސް ބަޔަކު ވަނީ ހަމަލާ ދީފަ އެވެ. އޭނާއަށް ހަމަލާ ދިނީ ވޯޓުލުމުގެ ކަންކަމުގައި ހަރަކާތްތެރިވަމުން ދަނިކޮށެވެ.