ސަތޭކަ ސާޅީހަތަރު ދަޅު އަދި ހަތަރު ފުޅި ބަނގުރަލާއެކު ބިދޭސީއަކު ހައްޔަރުކޮށްފި އެވެ.
މި މައްސަލައިގައި ހައްޔަރުކޮށްފައިވަނީ އެމްޑީ ކާލޫ (26އ) ނަމަކަށް ކިޔާ ބަންގްލަދޭޝް މީހެކެވެ.
އޭނާ ހައްޔަރުކުރީ ހުޅުމާލޭގައި ފުލުހުން ހިންގި ބަނގުރަލާ ގުޅުން ހުރި ހާއްސަ އޮޕަރޭޝަނެއްގެ ތެރެއިންނެވެ.
ފުލުހުން ބުނީ ރޭ ފުލުހުންނަށް ލިބުނު މައުލޫމާތަކާ ގުޅިގެން ހުޅުމާލޭ ފޭސް އެކެއްގެ މިދިލިމަގުން ކާރެއް ހުއްޓުވައި ބަލައި ފާސްކޮށްފައިވާ ކަމަށާއި އެ ކާރުގެ ތެރެއިން 144 ދަޅާއި ހަތަރު ފުޅި ބަނގުރާ ފެނިފައިވާ ކަމަށެވެ.
ރާއްޖޭގައި ހިންގާ ޖިނާއީ ކުށްތަކުގައި ބިދޭސީން ބައިވެރިވާ އަދަދު އިތުރުވަމުންދާ ކަމަށް ފުލުހުންގެ ތަފާސްހިސާބުން ހާމަވެ އެވެ. މިފަދަ ބިދޭސީންނާ ދެކޮޅަށް ފުލުހުންނާއި އިމިގްރޭޝަނުންވެސް ދަނީ ފިޔަވަޅު އަޅަމުންނެވެ. އެގޮތުން ޖޫރިމަނާކުރުމާއި ޖަލަށް ލުމާއި ޑީޕޯޓުކުރުން ވެސް ހިމެނެ އެވެ.