ގާނޫނާއި ގަވާއިދާ ހިލާފަށް ހުއްދަނެތި ބޭރު ފައިސާ މާރުކުރުމުގެ މަސައްކަތް ކުރަމުންދިޔަ ދެ ތަނެއް ހުއްޓުވައިފި އެވެ.
މި ދެ ތަން ހުއްޓުވީ ފުލުހުންނާއި އިކޮނޮމިކް މިނިސްޓްރީ ގުޅިގެން މާލޭގައި ހިންގި ދެ އޮޕަރޭޝަނެއްގެ ތެރެއިންނެވެ.
ފުރަތަމަ އޮޕަރޭޝަން މިމަހުގެ ތިންވަނަ ދުވަހު ކުރިއަށް ގެންދިޔައިރު މި އޮޕަރޭޝަންގައި "ޓްރާންސްފާ މޯލްޑިވްސް"ގެ ނަމުގައި، ހުއްދަ ހޯދުމަކައި ނުލައި ބޭރު ފައިސާ މާރުކުރުމުގެ ވިޔަފާރި ކުރަމުންދިއުމާ ގުޅިގެން އިކޮނޮމިކް މިނިސްޓްރީން ވަނީ ވިޔަފާރި ހުއްޓުވައި، ނޯޓިސް ހަރުކޮށްފަ އެވެ.
މިއަދު ކުރިއަށް ގެންދިޔަ ދެވަނަ އޮޕަރޭޝަނުގައި އެމްއެމްއޭ އިން ހުއްދަ ނުނަގައި ގަވާއިދާ ހިލާފަށް ބޭރު ފައިސާގެ މުއާމަލާތް ކުރަމުންދާކަން ފާހަގަކުރެވިފައިވާ ސޮވެނިޔަ ވިޔަފާރި ކުރާތަން ފުލުހުން ބަލައި ފާސްކޮށްފައިވެ އެވެ. އެގޮތުން ޗާންދަނީ މަގުގައި ހުންނަ ކާޝިބޯޓް ސުވެނިޔަ ފިހާރަށްއަށް ގޮސް ބެލިބެލުމުން އެތަނަކީ އެމްއެމްއޭ އިން ނަގަންޖެހޭ ހުއްދަތައް ނުނަގައި ބޭރު ފައިސާ ގަނެ ވިއްކުމުގެ މަސައްކަތް ކުރަމުންދާ ތަނެއްކަން ފާހަަގަކުރެވުނު ކަމަށް ފުލުހުން ބުންޏެވެ. އެހެންވެ އެ ފިހާރައަށް ވިޔަފާރިކުރުމަށް ދީފައިވާ ހުއްދަ ވަގުތީގޮތުން ވަނީ ބާތިލުކޮށްފަ އެވެ.
މީގެއިތުރުން މި އޮޕަރޭޝަންގައި، ބޭރު ފައިސާ މާރުކުރުމުގެ ހިދުމަތްދޭ ބައެއް ތަންތަން ބަލައި ފާސްކޮށް، ރަނގަޅު ކުރަންޖެހޭ ކަންކަން ރަނގަޅުކުރުމަށް އިރުޝާދު ދީފައިވާ ކަމަށްވެސް ފުލުހުން ބުންޏެވެ.