ޗައިނާގެ ތިން ސިޓީއަކަށް ޖެނެރަލް ކާގޯ ސޭލްސް އޭޖެންޓުން (ޖީއެސްއޭ) ހޯދަން ގައުމީ އެއާލައިން -- މޯލްޑިވިއަން އިން އިއުލާނުކޮށްފި އެވެ.
މޯލްޑިވިއަން ހިންގާ އައިލެންޑް އޭވިއޭޝަން ސާވިސް ލިމިޓެޑް (އައިއޭއެސްއެލް) އިން ވަނީ ޗައިނާގެ ވެރިރަށް ބެއިޖިން އާއި ގުއަންޒޯ އަދި ޗެންގްޑޫގައި ޖީއެސްއޭ ހޯދަން އިއުލާނުކޮށްފަ އެވެ.
އައިއޭއެސްއެލް އިން ހޯދަމުން ދަނީ އެ ތިން ސިޓީގައި މި ހިދުމަތް ތިން އަހަރަށް ދޭނެ ބައެކެވެ. ނަމަވެސް އޭގެ ކުރިން އެއްބަސްވުން ބާތިލުކުރެވިދާނެ ކަމަށް އައިއޭއެސްއެލް އިން ބުނެފައިވެ އެވެ.
ޗައިނާގެ އޮޕަރޭޝަންތައް މި އަހަރުގެ ނޮވެމްބަރު މަހު ފެށުމަށް ހަމަޖެހިފައިވާ ކަމަށްވެސް މޯލްޑިވިއަން އިން ބުނެފައިވެ އެވެ.
މިކަމަށް ޝައުގުވެރިވާ ފަރާތްތަކުން މިމަހުގެ 19 ވަނަ ދުވަހުގެ މެންދުރުފަހު 2:00 ގެ ކުރިން ޝައުގުވެރިކަން ފާޅުކުރަންޖެހެ އެވެ.
ޗައިނާގެ ތިން ސިޓީއަކަށް ކާގޯ ސޭލްސް އެޖެންޓުން ހޯދަން މޯލްޑިވިއަން އިން އިއުލާނުކޮށްފައިވާއިރު އެ ގައުމަކީ ރާއްޖެއަށް މިހާރު އެންމެ ގިނައިން ފަތުރުވެރިން ޒިޔާރަތްކުރާ ގައުމެވެ. އެގައުމުން މިއަހަރުގެ މިހާތަނަށް ދެ ލައްކައަށްވުރެ ގިނަ ފަތުރުވެރިން ޒިޔާރަތްކޮށްފައިވެ އެވެ.
މީގެ އިތުރުން ކަރަންޓް އެކައުންޓް މުއާމަލާތްތަކާއި ސީދާ އިންވެސްޓްމަންޓްތައް ދެ ގައުމުގެ ފައިސާއިން ހިންގުމަށް މަގުފަހިކުރުމަށް ދިވެހި ސަރުކާރުން ޗައިނާއާ އެކު އެމްއޯޔޫއެއްގައި އިއްޔެ ވަނީ ސޮއިކޮށްފަ އެވެ.