ފަޒީލާ އުސްމާންގެ ހިޖާމާ ކްލިނިކް ހުއްދަ ނެތި ހިންގާތީ އެތަން ބަނދުކޮށްދިނުމަށް ހެލްތް މިނިސްޓްރީން ފުލުހުންގެ އެހީތެރިކަމަށް އެދިއްޖެ އެވެ.
ފުލުހުން ބުނީ ހެލްތް މިނިސްޓްރީގެ ހުއްދައާ ނުލައި ހުޅުމާލޭގައި ހިޖާމާ ކްލިނިކް ހިންގަމުންދާތީ އެ މައްސަލަ ބަލައިދިނުމަށް އެ މިނިސްޓްރީން އެދިފައިވާ ކަމަށެވެ.
ފަޒީލާގެ ކްލިނިކް ބަންދުކުރުމަށް ހެލްތް މިނިސްޓްރީން މީގެ ކުރިންވެސް އެންގި އެވެ. ނަމަވެސް ކްލިނިކުން ހުއްޓުމެއްނެތި ހިދުމަތް ދެމުން ދިޔަ އެވެ.
މިނިސްޓްރީން މި މަހުގެ 12 ވަނަ ދުވަހު ނެރުނު އިއުލާނެއްގައި ވަނީ ކްލިނިކް ރަޖިސްޓްރީކުރުމަށް އަންގާ، ލައިސަންސް ލިބުމުގެ ކުރިން މަސައްކަތް ނުކުރުމަށް ފަޒީލާއަށް އަންގާފަ އެވެ. އަދި މަސައްކަތް ކުރާނަމަ ގާނޫނީ ފިޔަވަޅު އަޅާނެ ކަމުގެ އިންޒާރުވެސް ދީފައިވެ އެެވެ.
މިނިސްޓްރީން ވަނީ ފަޒީލާގެ ކްލިނިކް އެޑްވަޓައިޒް ކުރުމަށް ސޯޝަލް މީޑިއާގައި ހުރި ޕޯސްޓުތަކާއި ބަލި މީހުންގެ ސިއްހީ ރިޕޯޓުތައްވެސް ނެގުމަށް އަންގާފަ އެވެ.
ހެލްތު މިނިސްޓްރީން ބުނީ އެފަދަ ޕޯސްޓްތައް މިނިސްޓްރީގެ ހުއްދައާ ނުލައި ކުރުމަކީ މަނާކަމެއް ކަމަށާއި، ބަލި މީހުންގެ ރިޕޯޓުތަކަކީ ސައްހަ ރިޕޯޓްތަކެއްކަން ޔަގީން ނުވާ ކަމަށެވެ. ނަމަވެސް އެ އެންގުމާ ހިލާފަށް ފަޒީލާ ވަނީ ބަލި މީހުންގެ ތެރެއިން ދެ މީހެއްގެ ފޮޓޯ އޭނާގެ ސޯޝަލް މީޑިއާގައި އާންމުކޮށްފަ އެވެ.
މިނިސްޓްރީން މީގެ ކުރިންވެސް ވަނީ އެކި ފަހަރު މަތިން ހުއްދައަކާ ނުލާ ހިންގާތީ ހިޖާމާ ކްލިނިކް ހިންގުން ހުއްޓާލަން އަންގާފަ އެވެ.
ސޯޝަލް މީޑިއާގައި 43،000 އަށް ވުރެ ގިނަ މީހުން ފަޒީލާގެ ކްލިނިކް ފޮލޯކުރާއިރު، އޭނާ ވަނީ ބޭހުގެ ބަދަލުގައި ހިޖާމާ ބޭނުންކުރުމަށް ބާރުއަޅައި، އެކަމާ ގުޅޭ އެކި ޕޯސްޓުތައް އާންމުކޮށްފަ އެވެ.
ފަޒީލާގެ ކްލިނިކަކީ ގިނަ ބަޔަކު ހިދުމަތް ހޯދަމުން އަންނަ މަޝްހޫރު ކްލިނިކެކެވެ. އޭނާގެ ކްލިނިކަށް ދުވާލަކު 30 ވަރަކަށް މީހުން އަންނަ ކަމަށް އޭނާ މައުލޫމާތުދެ އެވެ.