ކޮމާޝަލް ބޭންކް ކައިރީ ހުރި ބައިސްކަލެއް ވަގަށް ނެގި މީހަކު ޖަލަށްލައިފި އެވެ.
ބައިސްކަލެއް ވަގަށް ނަގައިގެން ޖަލަށްލާން ހުކުމް ކުރީ ކ. ތުލުސްދޫ ފިރިހެނެކެވެ.
މައްސަލައިގެ ޝަރީއަތުގައި ދައުވާ ލިބުނު މީހާ ވަނީ އޭނާ އެ ވައްކަން ކުރި ކަމަށް އިއުތިރާފު ވެފަ އެވެ.
އޭނާ ބުނީ ތަޅު ނުލައި ހުރި ބައިސްކަލެއް ފެނުމުން ދުއްވާލަން ބޭނުންވެގެން ގެންދެވުނީ ކަމަށެވެ.
ބައިސްކަލް ވަގަށް ނެގި ކަމަށް އެ މީހާ އިއުތިރާފުވުމުން ކޯޓުން މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލައެއްގެ ގޮތުގައެވެ.
މައްސަލައިގެ ޝަރީއަތުގައި އެ މީހާ ވަނީ އޭނާއަށް ޖޫރިމަނާ އަދަބެއް ދިނުމަށް އެދޭ ކަމަށް ބުނެފަ އެވެ. ވަޒީފާއެއް އަދާނުކުރި ނަމަވެސް ޖޫރިމަނާ ދައްކަން އާއިލާއިން އޭނާއަށް އެހީވާނެ ކަމަށްވެސް ބުންޏެވެ.
އެކަމަކު 21،000 ރުފިޔާގެ ޖޫރިމަނާއެއް ދެއްކިދާނެ ކަމަށް ޝަރީއަތަށް ނުފެންނަ ކަމަށް ވިދާޅުވެ މައްސަލަ ބެއްލެވި ގާޒީ ނިންމެވީ އޭނާގެ މައްޗަށް ޖަލު ހުކުމެއް ކުރާށެވެ.
މައްސަލަ ނިންމީ ތިން މަހާއި 18 ދުވަހަށް އެ މީހާ ޖަލަށްލުމަށް ހުކުމްކޮށްފަ އެވެ.
