ހަތިޔާރު ބޭނުންކޮށް ފޭރުމުގެ ތުހުމަތުގައި ހައްޔަރުކޮށްފައި ތިބި ތިން މީހަކު، ކްރިމިނަލް ކޯޓުން ދޫކޮށްލައިފި އެވެ.
ޝަރުތުކުރުމަށް ފަހު މި ތިން މީހުން ދޫކޮށްލުމަށް ނިންމީ ކްރިމިނަލް ކޯޓުގެ ގާޒީ އިބްރާހީމް އިހްސާން އެވެ.
އިހްސާން ދޫކޮށްލި ތިން މީހުންނަކީ، މުހައްމަދު ނާޝިޒް ނާޒިމް 28، ހަސަން އަލީމް ޒުހުރީ 24، އަދި އަލީ އަކްރަމް 26، އެވެ.
މި ތިން މީހުން ދޫކޮށްލީ ތިން މީހުންވެސް 45 ދުވަހު ބަންދުގައި މިހާތަނަށް ތިބި ކަމަށް ބުނެ އިތުރަށް ބަންދުގައި ބައިތިއްބަން ނުފެންނަ ކަމަށް ބަލާފަ އެވެ.
މި މީހުން ޝަރުތާއެކު ދޫކޮށްލައި ނެރުނު އަމުރުގައި، މި މީހުންގެ މައްޗަށް ތުހުމަތު ކުރެވޭ ކުށް ސާބިތުވެއްޖެނަމަ އަންނާނެ އަދަބަކީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް ކަމަށް ބުނެފައިވެ އެވެ.
މި ތިން މީހުން ފޭރުނު ކަމަށް ބެލެވޭ ތަކެތި ވެރިފަރާތާ މިހާރު ހަވާލުކޮށްފައިވާ ކަމަށްވެސް ބަންދުން ދޫކޮށްލި ކޯޓު އަމުރުގައި ބަޔާންކޮށްފައިވެ އެވެ.
މި މައްސަލަތަކީ ޖިނާއީ ބޮޑު ކުށެއް ކަމަށް ދައުލަތުން ބުނި ނަމަވެސް ޝަރީއަތަށް ފާހަގަކުރެވޭ ގޮތުގައި އެކަންކަމަކީ ޖިނާއީ ބޮޑު ކުށެއް ނޫން ކަމަށްވެސް އަމުރުގައި ގާޒީ އިހްސާން ބަޔާންކޮށްފައިވެ އެވެ.
ފޭރުމާއި، މާރާމާރީގެ މައްސަލަތައް އިތުރުވެފައި ވަނިކޮށް ކޯޓުން ތިން މީހަކު ދޫކޮށްލިއިރު، ތިން މީހުންނަކީވެސް ކުށުގެ ރެކޯޑްތައް ކުރިން އޮތް މީހުންކަން ކޯޓު އަމުރުގައި ބަޔާންކޮށްފައިވެސް ވެއެވެ.