ގަވައިދާ ހިލާފަށް ބަނގުރާ ގެންގުޅެ ވިޔަފާރި ކުރުމުގެ ތުހުމަތުގައި ބިދޭސީ ދެ ފިރިހެނުން ހައްޔަރުކޮށްފި އެވެ.
ފުލުހުންގެ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހުޅުމާލެ ފޭސް ތިނެއްގައި ހިންގި އޮޕަރޭޝަންގައި ހައްޔަރުކޮށްފައިވަނީ ޕަރަން ދާސް (49އ) އަދި އަލް އަމީން (30އ) އެވެ.
މި ދެ މީހުންނަކީވެސް ބަންގްލަދޭޝްއަށް ނިސްބަތްވާ މީހުންނެވެ.
މި އޮޕަރޭޝަންގައި ހުޅުމާލެ ފޭސް ތިނެއްގައި ކޮންސްޓްރަކްޝަން މަސައްކަތްކުރާ ސައިޓަކުން މި މީހުން ހައްޔަރުކޮށް، ބަލައި ފާސްކުރިއިރު 324 ދަޅު ބަނގުރާ، 378 ފުޅި ބަނގުރާ އަދި ބަނގުރާ ކަމަށް ބެލެވޭ އެއްޗެއް ހުރި ފަސް ލީޓަރުގެ 10 ފުޅިއާއި 500 އެމްއެލްގެ ހަތް ފުޅި ފެނިފައިވާ ކަމަށް ފުލުހުން މައުލޫމާތުދެ އެވެ.
ރާއްޖޭގައި ގަވައިދާ ހިލާފަށް ބަނގުރާ ވިއްކުމުގައި ބިދޭސީންގެ ދައުރު ބޮޑުކަން ފުލުހުންގެ ތަހުގީގުތަކުން ހާމަވެ އެވެ.