އަހަންނަކީ އަބަދުވެސް މަސައްކަތަށް ގަޑިޖެހޭ މީހެކެވެ. ކޮންމެ ދުވަހަކުވެސް އޮފީހަށް ގޮސްވަނުމާއެކު އެންމެންގެ ލޯތަށް އަހަންނާދިމާއަށް އަމާޒުވަނީ ކުށެއްކުރެވިގެން އުޅޭމީހެއްގެ ނަޒަރުންނެވެ. ގަޑިނުޖެހި ދެވޭތޯ ކިތަންމެ މަސައްކަތެއް ކުރިނަމަވެސް ކޮންމެ ދުވަހަކުވެސް އޮފީހަށް ދެވެނީ ގަޑި ޖެހޭ ފަހުންނެވެ. ގަސްތުގައެއް ނޫނެވެ. ގަޑި ޖެހުން މިހާރު ވަނީ އާދައަކަށް ވެފައެވެ. ކިތަންމެ ފަހަރަށް އިންޒާރު ދީފައި ވީނަމަވެސް މިކަމަށް އެއްވެސް ހައްލެއް އައިސްފައެއް ނުވެއެވެ.
އޮފީހަށް ގަޑިޖެހިގެން ދެވޭއިރަށް އޮފީހުގައި ބޮޑު ގޮނޑީގައި އިންނަވާ ބޮސްގެ ނުރުހުމުގެ ބެލުން އަމާޒު ވަނީ ވެސް ހަމަ އަހަންނަށެވެ. އަދި ބޮސް ހަރުކަށި ބަސްތައް އަޑުއަހަން ވެސް ޖެހެނީ ހަމަ އަހަންނަށެވެ.
ތިބާ އަށްވެސް އެހެން ވޭހެއްޔެވެ؟
މިއީ އަހަންނަށް ނޫންނަސް އެތައް ބަޔަކަށް ދިމާވާ ކަމެކެވެ. މިކަމާ ވިސްނާ ބޯގޮވާފައި ތިބި މީހުން ވެސް ތީގެ ތެރޭގައި މަދެއް ނުވާނެ އެވެ.
އެހެންނަމަވެސް ސައިންސްގެ ހޯދުންތަކުން ދައްކާގޮތުގައި، ގަޑިޖެހުމުގެ ނުބައި އާދަ އަށަގެންފައިވާ މީހުންނަކީ މަސައްކަތަށް ގާބިލު އަދި ހުނަރުވެރި މީހުންނެވެ. އަދި އެފަދަ މީހުންނަށް އެތައް މަސައްކަތެއް އެއްފަހަރާ ކުރެވޭއިރު، އެކަމުގެ ސަބަބުން އެހެންމީހުނަށް އިތުރު ފަސޭހައަކާއި ލުޔެއް ލިބޭނެކަން ޔަގީނެވެ.
"ސަން ޑިއެގޯ ސްޓޭޓް ޔުނިވާސިޓީ" އިން ކުރި ދިރާސާއަކުން ދައްކާ ގޮތުގައި ގަޑި ޖެހޭމީހުންނަކީ އެހާ ފަސޭހައިން ކަންތައްތަކާ ހާސްވާ ބައެއް ނޫނެވެ. ކިތަންމެ ބޮޑު ނުވަތަ ކޮންމެ ކަހަލަ މަސައްކަތެއް ވިޔަސް އެއްވެސް ހާސް ވުމެއް ނެތި ފަސޭހަ ކަމާއެކު ނިންމާލަ އެވެ. އަދިއެއީ ހުރިހާ މިޒާޖެއްގެ މީހުނާވެސް ގުޅޭ، ކަންކަމުގައި ގޮތް ދޫކުރާ މީހުންނެވެ.
މީގެއިތުރުން ޑިއާނާ ދެލޮންޒޯ އޭނާގެ " ނެވާ ބީ ޓޫ ލޭޓް" ފޮތުގައި ލިޔެފައިވާ ގޮތުން އަބަދު ގަޑި ޖެހޭ މީހުންނަކީ އެމީހުންގެ މުޅި އުމުރުގައި ވެސް ކަންކަމުގައި ލަސްކުރާ މީހުން ކަމާއި، ރަނގަޅު ނުވަތަ ގޯސް ކަމެއް ކުރުމުގައި ވެސް އެމީހުން ލަސް ކުރާނެ ކަމެވެ. ސައިންޓިފިކް ހޯދުންތަކުން ދައްކާ ގޮތުގައި ގަޑި ޖެހުން އެއީ އެމީހުންގެ ކަށީގައި ހަރުލާފައިވާ ކަމެކެވެ.
ސައިންސްގެ މި ހޯދުންތައް ބޮސްއަށް ދައްކާލުން ކިހިނެއްވާނެ ހެއްޔެވެ؟
ދެން ގަޑި ޖެހިގެން އޮފީހަށް ދެވޭ ދުވަހަކުން، ބޮސް އެއްޗެއް ބުނުމުގެ ކުރިން، ސައިންސްވެރިންގެ މި ހޯދުންތައް ދައްކާލައި، ތިމާއަކީ މަސައްކަތަށް ގާބިލު އަދި ހުނަރުވެރި މީހެއްކަން ސާބިތުކޮށް ދިނުމަކީ ހަމަ ރަނގަޅު ކަމެކެވެ. ގަޑި ޖެހޭތީ ބޯގޮވާފައި ތިބި މީހުންނަށް ސައިންސްވެރިންގެ މި ހޯދުންތަކުގެ ސަބަބުން ހިނިތުވެލައިގެން ނިދާލެވޭނެކަން ގައިމެވެ.