ގއ. ވިލިނގިލީގެ އުމުރުން ދުވަސްވީ އަންހެނެއްގެ ކޭޝް ކާޑް ވަގަށް ނަގައިގެން ގއ. މާމެންދޫގައި ހުރި ބީއެމްއެލްގެ އޭޓީއެމް އިން ފައިސާ ނެގި މައްސަލައިގެ ތުހުމަތުގައި ދެ މީހަކު ހައްޔަރުކޮށްފި އެވެ.
މައްސަލައިގެ ތުހުމަތުގައި ހައްޔަރުކޮށްފައިވަނީ ގއ. ވިލިނގިލި، ލައިފް، މުހައްމަދު ޝައިން ޝަމީޒް (22 އ) އާއި، ލ. ގަން، ތުނޑި، ނޯތު ހެވަން، ހަމްދޫން ހަލީލް (24 އ) އެވެ.
ފުލުހުން ބުނި ގޮތުގައި މިމައްސަލަ ރިޕޯޓްކޮށްފައިވަނީ ރޭ 8:13 ހާއިރު އެވެ.
މައްސަލަ ރިޕޯޓް ކުރުމާ އެކު ކުރިއަށް ގެންދިޔަ އޮޕަރޭޝަންގައި ކާޑު ވަގަށް ނެގި ކަމަށް ތުހުމަތުކުރެވޭ މީހުން މާމެންދޫ އިން ވިލިނގިއްޔަށް ދަނިކޮށް ކަނޑުމަތިން ހުއްޓުވައި ފުލުހުން ވަނީ އެ މީހުން ހައްޔަރުކޮށްފަ އެވެ.
ފުލުހުން ބުނީ އެ މީހުން ދަތުރުކުރި ލޯންޗް ބަލައި ފާސްކުރިއިރު އެ ކޭޝް ކާޑު ބޭނުންކޮށްގެން އެ މީހުން ވަގަށް ނެނގި ކަމަށް ބެލެވޭ 25،000 ރުފިޔާގެ ތެރެއިން 23،000 ރުފިޔާ ފެނިފައިވާ ކަމަށެވެ. އަނެއް 2،000 ރުފިޔާއަށްވީ ގޮތެއް ފުލުހުން ނުބުނެ އެވެ.
މިމައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.