މާރާމާރީއަކާ ގުޅިގެން އިންޓަޕޯލް ރެޑް ނޯޓިސް ނެރެގެން ފުލުހުން ހޯދި ތިން މީހުންގެ ތެރެއިން ދެ މީހުންގެ މައްޗަށް ދައުވާ ކުރުމަށް ތައްޔާރުވެއްޖެ އެވެ.
ފުލުހުން ބުނި ގޮތުގައި މިދިޔަ އަހަރުގެ ސެޕްޓެމްބަރު މަހުގެ ހަތަރުވަނަ ދުވަހު މާލޭގައި ނުރައްކާތެރި ހަތިޔާރު ބޭނުންކޮށްގެން މީހަކާ މެދު މާރާމާރީ ހިންގާފައިވާ މައްސަލައަކާ ގުޅިގެން އެ ތިން މީހުން ހައްޔަރުކޮށްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ.
"ކޯޓު އަމުރެއްގެ ދަށުން މި މީހުން ހައްޔަރުކޮށްފައިވަނީ ތައިލެންޑުން ރާއްޖެ އައި ވަގުތު،" ފުލުހުން ކުރިން ބުނެފައިވެ އެވެ.
މި މައްސަލައާ ގުޅިގެން ހައްޔަރުކޮށްފައިވަނީ މާލެ، މ. މަސްކޮތަންގެ، ސިބްޠް އަބްދުﷲ (19އ) އާއި މާލެ، ހ. ދޮންތުނޑި މުހައްމަދު އަހްސަމް (26އ) އަދި ލ. ގަން، މުކުރިމަގު، އަސްވާނު މުހައްމަދު (28އ) އެވެ.
މިދިޔަ މަހުގެ 18 އަދި 19 ވަނަ ދުވަހު ހައްޔަރުކުރި މި މީހުންގެ ތެރެއިން އެކަކު ވަނީ ކުރިން ދޫކޮށްލާފަ އެވެ. އެއީ އަސްވާނު އެވެ. އަނެއް ދެ މީހުން ވާނުވާ ބަންދުގައި ތިބިއިރު ދެ މީހުންގެ މައްޗަށް އަންނަ ހަފްތާގައި ދައުވާ ކުރާނެ އެވެ.
"މި ތިން މީހުން ހޯދުމަށްވެސް އިންޓަޕޯލް ރެޑް ނޯޓިސް ނެރެފައިވޭ. ތިން މީހުންވެސް ރާޢްޖެ އައިސްފައިވަނީ ފިލައިގެން އުޅެނިކޮށް ތައިލެންޑް އިން ޑީޕޯޓްކޮށްލުމުން،" ފުލުހުން ބުނެފައިވެ އެވެ.