ސައިކަލެއްގެ މަޑިދަށުން ހަތަރު ލައްކައަށް ވުރެ ގިނަ ރުފިޔާ ވަގަށް ނެގި ކަމަށް ތުހުމަތު ކުރާ ބިދޭސީ މީހާގެ ބަންދު އަނެއްކާވެސް އިތުރުކޮށްފި އެވެ.
މާލޭގައި ސައިކަލެއްގެ މަޑިދަށުން ވަގަށް ނެގި ކަމަށް ވަނީ 442،750 ރުފިޔާ އެވެ.
މި މައްސަލާގައި ބަންގްލަދޭޝް މީހެއް ކަމަށްވާ ޖަހަންގިރް އާލަމް ވަނީ ހައްޔަރުކޮށްފަ އެވެ.
ޖަހަންގިރްގެ ބަންދު އެކި ފަހަރު މަތިން އިތުރުކޮށްފައިވާއިރު އޭނާ ބުނެފައިވަނީ އޭނާ ފްރޭމްކޮށްފައިވާ ކަމަށެވެ. އޭނާގެ ބަންދަށް އެންމެ ފަހުން ޖެހީ ހަތް ދުވަހެވެ.
ޖަހަންގިރްގެ ބަންދުގެ މުއްދަތު މަޖިލީހުގައި ފުލުހުން ވަނީ އޭނާ އެ ކުށްކުރި ކަމަށް ތުހުމަތު ކުރެވޭ ސީސީޓީވީ ވީޑިއޯ ހުށަހަޅާފަ އެވެ. މީގެއިތުރުން ފައިސާގެ ވެރިފަރާތުގެ ބަޔާންވެސް ވަނީ ހުށަހަޅާފަ އެވެ.
ވީޑިއޯ އިން އޭނާ ސައިކަލެއްގެ މަޑިދަށް ހިއްލައިގެން އެއްޗެއް ނަގާތަން ފެންނަ ކަމަށް ބުނެފައިވެ އެވެ.
ވީޑިއޯއިން ފެންނަ މަންޒަރުތަކަށް ޖަވާބުދެމުން ޖަހަންގިރްގެ ވަކީލު ކޯޓުގައި ވިދާޅުވެފައިވަނީ އެ ސައިކަލުގެ މަޑިދަށުން ނެގީ ވިއްސާރަ ކޯޓެއް ކަމަށެވެ. އަދި ޖަހަންގިރްގެ ދެވަނަ އަނބިމީހާގެ ގެއަށް ވައްދާތައް ފެންނަ ކޮތަޅަކީ ދޮންކޭލާއި ކަދުރު ހުރި ކޮތަޅެއް ކަމަށެވެ. އަދި އެއީ އޭނާގެ އާއިލާއިން ހިއްސާކުރި މައުލޫމާތު ކަމަށްވެސް ވަކީލު ވިދާޅުވި އެވެ.
ކޯޓު އަމުރުގައިވަނީ އެ މައްސަލާގައި ހުށަހަޅާފައިވާ ވީޑިއޯއިން ވިއްސާރަ ކޯޓެއްގެ އިތުރުން އެހެން އެއްޗެހި ނަގާ ތަން ފެންނަ ކަމަށާއި އޭނާ އެ އެއްޗެހި ނެގުމުގައި އަމަލުތައް ހުރި ގޮތުން އިތުރު އެއްޗެއް އޮތްކަން އެނގޭ ކަމަށެވެ.