މި އަހަރު ނިމޭއިރު ދައުލަތުގެ ދަރަނި 123.4 ބިލިއަން ރުފިޔާއަށް އަރާނެ ކަމަށް ފިނޭންސް މިނިސްޓްރީން ލަފާކޮށްފި އެވެ.
ފިނޭންސް މިނިސްޓްރީން އާންމުކުރި "މެދުރާސްތާގެ ދަރަނީގެ ސްޓްރެޓަޖީ 2025 - 2027" ގައިވާ ގޮތުން 2023 ވަނަ އަހަރު ނިމުނުއިރު ދައުލަތުގެ ދަރަންޏަކީ 110.8 ބިލިއަން ރުފިޔާ އެވެ. މިއީ ގައުމީ އުފެއްދުންތެރިކަމުގެ ނިސްބަތުން 109.6 ޕަސެންޓެވެ.
ދައުލަތުގެ ދަރަނި މި އަހަރު ނިމޭއިރު 123.4 ބިލިއަން ރުފިޔާއަށް އަރާނެ ކަމަށް ލަފާކޮށްފައިވާއިރު މިއީ ގައުމީ އުފެއްދުންތެރިކަމުގެ ނިސްބަތުން 114.1 ޕަސެންޓެވެ.
ފިނޭންސް މިނިސްޓްރީން މިދިޔަ އަހަރުގެ އޮކްޓޫބަރު މަހު ނެރުނު "ފިސްކަލް ސްޓްރެޓަޖީ އަންގައިދޭ ބަޔާން 2024-2026" ގައި ލަފާކުރި ގޮތުގައި 2024 ނިމޭއިރު ދައުލަތުގެ ދަރަނި 129 ބިލިއަން ރުފިޔާއަށް އަރާނެ އެވެ.
ފިނޭންސް މިނިސްޓްރީން އެންމެފަހުން ހާމަކުރި މެދުރާސްތާގެ ދަރަނީގެ ސްޓްރެޓަޖީގައިވާ ގޮތުން މި އަހަރު ނިމޭއިރު ޖުމްލަ ދަރަނީގެ ތެރެއިން 80.2 ބިލިއަން ރުފިޔާއަކީ އެތެރޭގެ ދަރަންޏެވެ. 43.2 ބިލިއަން ރުފިޔާއަކީ ބޭރުގެ ދަރަންޏެވެ.
އެތެރޭގެ ދަރަނީގެ 54 ޕަސެންޓަކީ ދައުލަތުން ވިއްކާފައިވާ ކުރުމުއްދަތުގެ ޓްރެޒަރީ ބިލް އެވެ.
ފާއިތުވި 2023 ވަނަ އަހަރު ނިމުނުއިރު ދައުލަތުގެ ބޭރުގެ ދަރަންޏަކީ 38 ބިލިއަން ރުފިޔާ އެވެ. ފިނޭންސް މިނިސްޓްރީން ލަފާކުރާ ގޮތުގައި މި އަހަރު ނިމޭއިރު ބޭރުގެ ދަރަނި 2023 ވަނަ އަހަރާ އަޅާބަލާއިރު 13.7 ޕަސެންޓް އިތުރުވާނެ އެވެ.