މަސްތުވާތަކެތީގެ ބޮޑު މައްސަލައެއްގައި އަދި މަރުގެ އިންޒާރު ދިން މައްސަލައެއްގައި މީގެ ކުރިން ބަންދުކޮށްފައިވާ މީހަކު، ކުރީގެ ލޯބިވެރިޔާއަށް އަނިޔާކުރި ކަމުގެ ތުހުމަތުގައި އަނެއްކާވެސް ހައްޔަރުކޮށްފި އެވެ.
މައްސަލައިގެ ތުހުމަތުގައި ހައްޔަރުކޮށްފައިވަނީ ގއ. ވިލިނގިލި، ނައިންފުލާވަ، އީމާން މުހައްމަދު އެވެ. އޭނާގެ އުމުރަކީ 28 އަހަރެވެ.
ރިކޯޑްތަކުން އެނގޭ ގޮތުގައި 2020 ވަނަ އަހަރުގެ ސެޕްޓެމްބަރު މަހު މަސްތުވާތަކެތީގެ ބޮޑު މައްސަލައެއްގައި އޭނާ ހައްޔަރުކޮށްފައިވެ އެވެ. އެއީ އެއް ކިލޯގެ މަސްތުވާތަކެތީގެ މައްސަލައެއްކަން ރެކޯޑްތަކުން އެނގެ އެވެ.
މީގެ ކުޑަ ދުވަސްކޮޅެއް ކުރިން، ޖަމާއަތް ހަދައިގެން މާރާމާރީ ހިންގުމާއި ބިރުދެއްކުމާއި އިންޒާރު ދިން މައްސަލައިގައިވެސް އޭނާ ހައްޔަރުކޮށްފައިވާކަން ރެކޯޑްތަކުން ދައްކަ އެވެ.
މި ފަހަރު އޭނާ ހައްޔަރުކޮށްފައިވަނީ މާރާމާރީގެ ތުހުމަތު ގައެވެ. މި ތުހުމަތުގައި އޭނާ ހައްޔަރުކޮށް 15 ދުވަސް އޭނާގެ ބަންދަށް ކޯޓުން ވަނީ ޖަހާފަ އެވެ. ބަންދު އަމުރު ރިޕޯޓުން އެނގޭ ގޮތުގައި އީމާން ވަނީ އޭނާގެ ކުރީގެ ލޯބިވެރިޔާއަށް އަނިޔާކޮށްފަ އެވެ.
އެ އަނިޔާތަކުގެ ތެރޭގައި އަންހެން ކުއްޖާގެ ތުންފަތް ފަޅައިގެން ދިޔުމުގެ އިތުރުން، އިނގިލިތައް ރަތްވެ، ފައިގެ ފަލަމަސްގަނޑުން އެކިތަންތަން ނޫފައިގަތުން އަދި ބުރަކަށި ރަތްވެފައި ހުރި ކަމަށް ބަންދު އަމުރު ރިޕޯޓުގައި ބަޔާންކޮށްފައިވެ އެވެ. މި އަމަލުތަކަކީ ގެވެށި ގުޅުމެއްގެ ތެރެއިން ހިނގާފައިވާ އަމަލުތަކެއްކަން ބަންދު އަމުރު ރިޕޯޓުގައި ފާހަގަކޮށްފައިވެ އެވެ.