ސިޔާސީ މަގާމެއްގައި ހުރެ ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައިކޯޓުން ނިންމާފައިވާ ނިންމުމާ ދެކޮޅު ހެދި މައްސަލައާ ގުޅިގެން ކްރިމިނަލް ކޯޓުގެ ގާޒީ އަލީ ނަދީމުގެ ސުލޫކީ މައްސަލައެއް ޖޭއެސްސީއަށް ހުށަހަޅައިފި އެވެ.
ރައީސް އައްޔަން ކުރާ ސިޔާސީ މަގާމެއްގައި ހުރެ، ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައިކޯޓުން ނިންމީ، ކުޑަކުއްޖަކަށް ޖިންސީ ގޯނާ ކުރި މީހެއްގެ ދިފާއުގައި، ޑެޕިއުޓީ މިނިސްޓަރެއްގެ މަގާމުގައި ހުންނަވައިގެން މުހައްމަދު ރާޣިބު ކޯޓަށް ދިއުމުންނެވެ.
ރާޣިބަށް ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައިކޯޓުން ނިންމާފައި ވަނިކޮށް، ނަދީމު ވަނީ އޭނާ ބަލަމުންދާ މައްސަލައެއް ކަމަށްވާ ކޭޕާކް މަންޑޭގެ މައްސަލައިގައި ރާޣިބު ދިފާއީ ވަކީލެއްގެ ގޮތުގައި ބަލައިގަންނަން ނިންމާފަ އެވެ.
ކޭ ޕާކް ރެސިޑެންސްގެ ފްލެޓްތައް ވިއްކުމުގެ ނަމުގައި ގިނަ ބައެއްގެ އަތުން ފައިސާ އަތުލި ކަމަށް ތުހުމަތުވާ ހަސަން މަމްދޫހު (މަންޑޭ)ގެ ވަކީލެއްގެ ގޮތުގައި އެންވަޔަރަންމަންޓް މިނިސްޓްރީގެ ޑެޕިއުޓީ މިނިސްޓަރު މުހައްމަދު ރާޣިބު އަހްމަދަށް ވަކާލާތު ކުރުމުގައި ހުރަހެއް ނެތް ކަމަށް ކްރިމިނަލް ކޯޓުގެ ގާޒީ އަލީ ނަދީމް ނިންމިއިރު މިދިޔަ ހަފްތާގައި ހައި ކޯޓުން ވަނީ ސިޔާސީ މަގާމެއްގައި ހުރެ ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ތިން ފަނޑިޔާރުންގެ އިއްތިފާގުން ނިންމާފަ އެވެ.
ކޭ ޕާކް ހަދަމުންދާ ހަންބޯ ކުންފުނީގެ ހިއްސާދާރެއް ކަމަށްވާ މަންޑޭ، ފްލެޓް ވިއްކާނެ ކަމަށް ބުނެ ގިނަ ބައެއްގެ އަތުން ފައިސާ ނެގި ކަމަށް ބުނެ އޭނާގެ މައްޗަށް 100 އަށް ވުރެ ގިނަ ދައުވާ ކުރެ އެވެ. އެއީ ޓެކުމުގެ 50 ދައުވާއަކާއި އޮޅުވާލުމުގެ 50 ދައުވާއެއްގެ އިތުރުން ސައްހަ ނޫން ލިޔުމެއް އުފެއްދުމުގެ ތިން ދައުވާ އަދި މަނީ ލޯންޑްރިންގެ އެއް ދައުވާ އެވެ. މިއީ ރާއްޖޭގައި އެކަކުގެ މައްޗަށް މިހާ ގިނަ ދައުވާ ކުރާ ފުރަތަމަ މައްސަލަ އެވެ.
ކްރިމިނަލް ކޯޓުގައި އޮތް އަޑުއެހުމުގައި މަމްދޫހުގެ ދިފާއީ ވަކީލެއްގެ ގޮތުން ރާޣިބް ހުންނެވުމުން ދައުލަތުން އެކަމަށް އިއުތިރާޒްކޮށް، ސަރުކާރުގެ ސިޔާސީ މަގާމެއްގައި ހުންނެވި ބޭފުޅަކު ވަކާލާތު ކުރުމަކީ މަސްލަހަތު ފުށުއަރާ ކަމެއް ކަމަށާއި އަދި އެއީ ވަކީލުންގެ ސުލޫކާ ޚިލާފް ކަމެއް ކަމަށް ދައުލަތުން ބުންޏެވެ. އަދި ރާޣިބް ވަކާލާތުކުރި އެހެން މައްސަލައެއްގައި، އޭނާއަށް ދިފާއީ ވަކީލެއްގެ ގޮތުގައި ވަކާލާތު ނުކުރެވޭނެ ކަމަށް ދާދިފަހުން ހައި ކޯޓުން ނިންމިކަން ދައުލަތުން ފާހަގަކުރި އެވެ. ނަމަވެސް އެ މައްސަލަ ބައްލަވާ ގާޒީ އަލީ ނަދީމް ވިދާޅުވީ އެ މީހަކު އިހްތިޔާރުކުރާ ވަކީލަކު ހަމަޖެއްސުމަކީ ކޮންމެ މީހެއްގެވެސް ހައްގެއް ކަމަށެވެ.
ހައި ކޯޓުން އެގޮތަށް ނިންމާފައި އޮތް ނަމަވެސް ރާޣިބްގެ އެ އަމަލަކީ ސުލޫކާ ޚިލާފް އަމަލެއްކަން ނުވަތަ ނޫންކަން ކޯޓަށް ނުނިންމޭނެ ކަމަށާއި އެކަން ކުރެވޭނީ ބާ ކައުންސިލަށް ކަމަށް ގާޒީ ވިދާޅުވި އެވެ. އަދި ވަކީލުންގެ ސުލޫކާ ގުޅޭގޮތުން ކޯޓަށް ފިޔަވަޅު އެޅޭނީ ޝަރީއަތުގެ މަޖިލީހުގައި ހިނގާ ކަންކަމާ ގުޅިގެން އެކަނި ކަމަށް ގާޒީ ނަދީމް ވިދާޅުވި އެވެ. އެހެންވެ، ރާޣިބަށް އެ މައްސަލާގައި ދިފާއީ ވަކީލެއްގެ ގޮތުގައި ވަކާލާތު ކުރެވޭނެ ކަމަށް ގާޒީ ނިންމެވި އެވެ. އަމިއްލަ ފަރާތަކުން ޖޭއެސްސީއަށް ހުށަހެޅި ސުލޫކީ މައްސަލައަކީ ނަދީމްގެ މި ނިންމެވުމެވެ.
މި މައްސަލަ ސުލޫކީ މައްސަލައެއްގެ ގޮތުގައި ޖޭއެސްސީއަށް ހުށަހެޅި ނަމަވެސް އެކަމާ ގުޅޭ ގޮތުން ޖޭއެސްސީން އަދި މިހާތަނަށް އެއްވެސް އެއްޗެއް ބުނެފައެއް ނުވެއެވެ. ޖޭއެސްސީން މިހާރު އަމަލު ކުރަމުން އަންނަ އުސޫލަކީ، ސުލޫކީ މައްސަލައެއް ފަނޑިޔާރަކާ ގުޅޭ ގޮތުން ހުށަހެޅުނު ނަމަވެސް އެ މައުލޫމާތު އާއްމުނުކޮށް، އެފަދަ މައްސަލައެއް ބަލަން ނިންމައިފިނަމަ އާއްމު ކުރުމެވެ.
ދާދިފަހުން ރާޣިބް ދިފާއީ ވަކީލެއްގެ ގޮތުގައި ވަކާލާތުކުރީ ކުޑަކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މީހެއްގެ މައްސަލައެއްގަ އެވެ. ނަމަވެސް ސިޔާސީ މަގާމެއްގައި ހުރެގެން ވަކާލާތު ކުރާތީ ދައުލަތުން ހައި ކޯޓުގައި އެކަން ފާހަގަކުރުމުން، އެޓާނީ ޖެނެރަލްގެ އޮފީހުން ވެސް އަންގާފައިވަނީ ސިޔާސީ މަގާމުތަކުގައި ތިބެގެން ދިފާއީ ވަކީލެއްގެ ގޮތުގައި މަސައްކަތް ނުކުރެވޭނެ ކަމަށެވެ. އެހެންވެ، ހައި ކޯޓުން ވެސް ނިންމާފައި އޮތީ ރާޣިބަށް އެ މައްސަލާގައި ވަކާލާތު ނުކުރެވޭނެ ކަމަށެވެ.