މަގުމަތިން ދުއްވާފައި ދިޔަ ޕިކަޕެއް ހުއްޓުވައި ބަލައި ފާސްކޮށް ބަނގުރާ ފުޅިތަކަކާ އެކު ތިން ބިދޭސީން ހައްޔަރުކޮށްފި އެވެ.
ފުލުހުން ބުނީ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ރޭ ހިންގި އޮޕަރޭޝަނެއްގައި މި މީހުން އަތުލައިގަތީ ހުޅުމާލެ އިން ކަމަށެވެ.
ފުލުހުންގެ ބެލުމުގެ ދަށަށް ގެންގޮސްފައިވަނީ ބިކާރާ ކުމާރު، އިންޑިއާ (24އ)، އަކިލޭޝް ކުމާރު، އިންޑިއާ (27އ) އަދި އުމާކަންތު ޗޯދަރީ، ނޭޕާލް (35އ) އެވެ.
މި މީހުން ހުއްޓުވާފައިވަނީ ހުޅުމާލޭގެ ފުރަތަމަ ފިޔަވަހީގެ މަގުމަތިން ޕިކަޕް ދުއްވާފައި ދަނިކޮށެވެ. މި މީހުން ތިބި ޕިކަޕުން 48 ފުޅި ބަނގުރާ ފުލުހުން ހޯދާފައިވެ އެވެ.
މި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ ތިން މީހުން 10 ދުވަހަށް ބަންދުކުރުމަށް އަމުރުކޮށްފަ އެވެ.