ރާއްޖޭގައި ދިރާސާއެއް ހަދަން އައިސް މޫދަން ފުންމާލި 15 އަހަރުގެ ކުއްޖަކު ދޯންޏެއްގެ ބުރަފަތީގައި ޖެހި މިއަދު މަރުވެއްޖެ އެވެ.
ސިންގަޕޫރަށް ނިސްބަތްވާ މި ކުއްޖާ ރާއްޖެ އައިސް އުޅުނީ ވޭލް ޝާކްގެ ދިރާސާއެއް ހެދުމަށެވެ.
މިކުއްޖާ މަރުވުމަށް މެދުވެރިވި ހާދިސާ ހިނގާފައިވަނީ އދ. ދިގުރަށް ކައިރީގައެވެ.
މި ކުއްޖާ ދޯނީގެ ބުރަފަތީގައި ޖެހުނީ މޫދަށް ފުންމާލި ވަގުތު ކަމަށް ފުލުހުން މައުލޫމާތު ދީފައިވެ އެވެ.
ހާދިސާ ހިނގިތާ ކުޑައިރުކޮޅެއްގެ ތެރޭގައި މި ކުއްޖާ ދިގުރަށު ސިއްހީ މަރުކަޒަށް ގެންދިޔަ ނަމަވެސް އޭރުވެސް އޭނާ މަރުވެފައިވާ ކަމަށް ޑޮކްޓަރުންނާ ހަވާލާދީ ފުލުހުން ބުންޏެވެ.
ފުލުހުން ދަނީ މި ހާދިސާ އިތުރަށް ތަހުގީގު ކުރަމުންނެވެ.