"ކޮޕް 29"ގައި ބައިވެރިވެވަޑައިގަތުމަށް އެންވަޔަރަމަންޓް މިނިސްޓަރު ތޯރިގު އިބްރާހީމް، އަޒަރުބައިޖާނަށް ފުރާވަޑައިގެންފި އެވެ.
މި ސަމިޓު ކުރިއަށްދާނީ މިމަހުގެ 11 އިން 22ގެ ނިޔަލަށް އަޒަރުބައިޖަންގެ ވެރިރަށް ބާކޫގަ އެވެ. ކޮޕްގެ މި އަހަރުގެ ޝިއާރަކީ "އިން ސޮލިޑޭރިޓީ ފޯ އަ ގްރީން ވޯލްޑް" އެވެ.
މިނިސްޓަރު ތޯރިގު ވިދާޅުވީ މި ފަހަރުގެ ކޮޕް ސަމިޓުގައި ރާއްޖޭން މުހިންމު ދައުރެއް އަދާކުރާނެ ކަމަށެވެ.
އެ ގޮތުން ކޮޕްގެ ހަވާސާގައި ހަތަރު އިވެންޓެއް ރާއްޖޭން އިންތިޒާމު ކުރުމަށް ވަނީ ހަމަޖެހިފަ އެވެ.
އޭގެ ތެރޭގައި ކުދި ޖަޒީރާ ގައުމުތަކުގެ ކްލައިމެޓް އެޑަޕްޓޭޝަން މިނިސްޓީރިއަލް ޗެމްޕިއަނެއްގެ ގޮތުގައި ކުރިއަށްގެންދާ ހަރަކާތަކާއި އޭޑީބީއާ ގުޅިގެން ކުރިއަށްގެންދާ އިއާދަކުރަނިވި ހަކަތައާ ގުޅޭ ހަރަކާތެއް ހިމެނެ އެވެ.
ކޮޕް 29 ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިވެރިވެވަޑައިގެން ތަގުރީރު ކުރެއްވުމަށްވަނީ ހަމަޖެހިފަ އެވެ.