މުދާ އެތެރެކުރާއިރު ކަސްޓަމްސް މެދުވެރިކޮށް އެ މުދަލުން ޖީއެސްޓީ ނަގަން އަންނަ އަހަރުގެ ބަޖެޓުގައި ހިމަނައިފި އެވެ.
ފިނޭންސް މިނިސްޓްރީން އާންމުކޮށްފައިވާ އަންނަ އަހަރުގެ ބަޖެޓުގެ ތަފުސީލުގައިވާ ގޮތުން ޑެސްޓިނޭޝަން ޕްރިންސިޕަލް ފުރިހަމައަށް ތަންފީޒުކޮށް އަންނަ އަހަރުގެ ޖޫން އިން ފެށިގެން އިމްޕޯޓުން ޖީއެސްޓީ ނަގަން ފަށަން ވަނީ ނިންމާފަ އެވެ.
މި ބަދަލާއެކު ޖީއެސްޓީ ބޭސް ބޮޑުވެ، އަންނަ އަހަރު މި ސިޔާސަތުން ޖެނެރަލް ޖީއެސްޓީގެ ގޮތުގައި 573.8 މިލިއަން ރުފިޔާ އިތުރަށް ލިބޭނެ ކަމަށް ވަނީ އަންދާޒާކޮށްފަ އެވެ.
ބަޖެޓު ތަފުސީލުގައިވާ ގޮތުން މުދާ (ޓޭންޖިބްލް ގުޑްސް) އެތެރެކުރާއިރު ކަސްޓަމްސް މެދުވެރިކޮށް އެ މުދަލުން ޖީއެސްޓީ ނަގާނެ އެވެ. އެގޮތުން ކޮންސިއުމަރުންނާއި ޖީއެސްޓީއަށް ރަޖިސްޓަރީކޮށްފައިވާ އަދި ރަޖިސްޓަރީކޮށްފައިނުވާ މީހުންވެސް އިމްޕޯޓްކުރާ މުދަލަށް ބޯޑަރުގައި ޖީއެސްޓީ ނަގާނެ އެވެ.
ނަމަވެސް، އިމްޕޯޓްކުރާ ލޯ ވެލިއު އިމްޕޯޓެޑް ގުޑްސް (އެލްވީއައިޖީ) އިން ޖީއެސްޓީ ނަގާނީ ވެންޑާ ރެޖިސްޓްރޭޝަން މޮޑެލްގެ ތެރެއިން ކަމަށް ބަޖެޓް ތަފުސީލުގައި ބުނެފައިވެ އެވެ.
މިކަން ތަންފީޒުކުރުމުގައި އިމްޕޯޓްކުރާ ފަރާތްތަކަށް ކުރިމަތިވެދާނެ ކޭޝްފްލޯގެ ދަތިތަކަށް ހައްލު ހޯދުމަށް އެހެން ގައުމުތަކުގައި އަމަލުކުރަމުންދާ އާންމު އުސޫލުތަކަށް ބަލާއިރު ޓެކުހަށް ރަޖިސްޓްރީކޮށްފައިވާ އަދި ކަނޑައަޅާފައިވާ އުސޫލުތަކަށް ރަނގަޅަށް ތަބާވާ "ކޮމްޕްލަޔަންޓް" ފަރާތްތަކަށް ފަހުން މީރާއަށް ޓެކްސް ދެއްކޭނެ "ޑިފާޑް ޕޭމަންޓް" އިންތިޒާމެއް ހަމަޖެއްސުމަށް ރާވާފައިވާ ކަމަށް ފިނޭންސް މިނިސްޓްރީން ބުނެ އެވެ.