ޓޫރިސްޓް ފެސިލިޓީތަކަށް ލިބޭ ޑޮލަރުން ވަކި މިންވަރެއް ރާއްޖޭގެ ބޭންކްތަކަށް މާރުކުރަންޖެހޭ ގޮތަށް މަރުކަޒީ ބޭންކް -- މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހެދި ގަވާއިދާ ގުޅޭ ގޮތުން ޓޫރިޒަމް ސިނާއަތުގެ ކަންބޮޑުވުންތައް ދެނެގަތުމަށް ރައްޔިތުންގެ މަޖިލީހުގެ އިގުތިސާދީ ކޮމިޓީން ބައްދަލުވުމެއް ބޭއްވުމަށް ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް އެދިވަޑައިގެންފި އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް، މެންބަރު މުހައްމަދު އިބްރާހީމް ފޮނުއްވި ސިޓީގައި ވަނީ ވަކި މިންވަރަކަށް ޑޮލަރު މާރުކުރަން ލާޒިމުކޮށްފައިވާތީ ޓޫރިޒަމް ސިނާއަތުގައި ކަންބޮޑުވުން ހުރި ކަމަށެވެ.
އެ ގޮތުން ރާއްޖެއަށް ޒިޔާރަތްކުރާ ޓޫރިސްްޓުންގެ ތެރެއިން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން، ބޭންކަށް މާރުކުރަން ލާޒިމުކޮށްފައިވާތީ ޓޫރިޒަމް ސިނާއަތުގައި އެކަމާމެދު ނުހަނު ބޮޑަށް ކަންބޮޑުވުން އޮތް ކަމަށް ދެކޭ ކަމަށް ސިޓީގައި މުހައްމަދު އިބްރާހީމް ވިދާޅުވި އެވެ.
މުހައްމަދު އިބްރާހީމް ވަނީ ޑޮލަރު މާރުކުރާ އުސޫލަށް އަމަލުކުރެވެން ނެތް ކަމަށް ބަޔާންކޮށް ރާއްޖޭގައި ގިނަ ރިސޯޓްތަކެއް ހިންގާ ޗަމްޕާ ބްރަދާސްގެ ވެރިޔާ މުހައްމަދު މޫސާ އެމްއެމްއޭއަށް ސިޓީއެއް ފޮނުވިކަން ފާހަގަކުރައްވާފަ އެވެ.
"މި ބޭފުޅުންނަކީ ދިވެހިރާއްޖޭގެ ޓޫރިޒަމް ސިނާއަތް މި ފެންވަރަށް ގެނައުމަށް ޓަކައި ބޮޑެތި އިންވެސްޓްމަންޓްތަކެއް ކުރެއްވުމާއެކު ނުހަނު ބޮޑެތި މަސައްކަތްތަކެއް ކުރައްވައިފައިވާ، އަދި ތަޖުރިބާކާރު ބޭފުޅުން ކަމަށް ވެފައި، ރާއްޖޭގެ އެންމެ މުހިންމު ސިނާއަތާ ގުޅޭ މިފަދަ މައްސަލައެއްގައި މި ބެފުޅުންގެ ކަންބޮޑުވުން ހާމަކުރަމުންދާ ހިނދު، އެ ކަމަކީ ރައްޔިތުންގެ މަޖިލީހުން ނުބަލައި ދޫކޮށްލައިގެން ވާނޭ ކަމެއް ނޫން ކަމުގައި ދަންނަވަމެވެ." މެންބަރު މުހައްމަދު އިބްރާހީމްގެ ސިޓީގައިވެ އެވެ.
މުހައްމަދު އިބްރާހީމް ވަނީ ޑޮލަރު މާރުކުރުމާ ގުޅޭ އެ ގަވާއިދާއި އެ ގަވާއިދާ ގުޅޭ ގޮތުން މިހާތަނަށް ކަން ހިނގިގޮތް ސާފުކުރުމަށާއި ޓޫރިޒަމް ސިނާއަތުގެ ކަންބޮޑުވުންތައް ރައްޔިތުންގެ މަޖިލީހުން ދެނެގަތުމަށް ހުށަހަޅުއްވާފަ އެވެ.
އެގޮތުން ޓޫރިޒަމް ސިނާއަތުގައި ހަރަކާތްތެރިވާ ވިޔަފާރިވެރިންނާ ބައްދަލުކޮށް، އާންމުކޮށް ހުޅުވާލައިގެން ރައްޔިތުންގެ މަޖިލީހުގެ އިގުތިސާދީ ކޮމިޓީން އެ ފަރާތްތަކުގެ އަޑު އެހުމުގެ ބައްދަލުވުމެއް ވަރަށް އަވަހަށް އިންތިޒާމުކޮށްދެއްވުމަށް މި ސިޓީގައި އެދިވަޑައިގެންފައިވެ އެވެ.
މެންބަރު މުހައްމަދު އިބްރާހީމް މިކަމަށް އެދިވަޑައިގެންފައިވާއިރު ޑޮލަރު މާރުކުރަންޖެހޭ ގޮތަށް ގަވައިދެއް ހަދައި، އެ ގަވައިދުގެ ދަށުން ރަޖިސްޓްރީވުމަށް ހުޅުވާލުމުން އެންމެ ރިސޯޓެއް ފިޔަވައި ހުރިހާ ރިސޯޓެއް އެކަމަށް ރަޖިސްޓްރީ ވެފައިވާ ކަމަށް އެމްއެމްއޭ އިން އިއްޔެ ވަނީ ބުނެފަ އެވެ.