އާސަންދަ ސްކީމް މެދުވެރިކޮށް އައިވީއެފް ހެދުމުގެ ފުރުސަތު ދެވަނަ ބުރުގައި ލިބޭ މީހުންގެ ލިސްޓަށް ހުށަހެޅި ޝަކުވާތަކަށް ރިއާޔަތްކޮށް ލިސްޓް މުރާޖައާ ކުރުމަށްފަހު އާންމުކޮށްފި އެވެ.
އައިވީއެފް ހަދަން ދެވަނަ ބުރުގައި އެހީ ދޭ 63 މީހުންގެ ލިސްޓް، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން އާންމުކުރީ މިދިޔަ އޮކްޓޫބަރު މަހުގެ 31 ވަނަ ދުވަހު އެވެ.
އެންސްޕާ އިން ރޭ ކުރި އިއުލާނެއްގައި ބުނީ ދެވަނަ ބުރުގެ ލިސްޓަށް ހުށަހެޅުނު ޝަކުވާތަކަށް ރިއާޔަތްކޮށް އެ ލިސްޓް މުރާޖައާކޮށްފައިވާ ކަމަށެވެ.
އެ އިއުލާނާއެކު އެންސްޕާ އިން ވަނީ އައިވީއެފްގެ ފަރުވާ ދެވަނަ ބުރުގައި ލިބޭ މީހުންގެ މުރާޖައާކޮށްފައިވާ ލިސްޓް އާންމުކޮށްފަ އެވެ.
އެގޮތުން ދެވަނަ ބުރުގައި ފޯމު ހުށަހެޅި ޖުމްލަ 216 މީހުންގެ ތެރެއިން އުސޫލުގެ ދަށުން އެހީއަށް ޝަރުތު ހަމަވެފައިވާ 64 މީހަކަށް ދެވަނަ ބުރުގައި އެހީ ހަމަޖެހިފައިވާ ކަމަށް އެންސްޕާ އިން ބުނެ އެވެ.
އެހީ ހަމަޖެހިފައިވާ މީހުންނަށް މިމަހުގެ 30 ވަނަ ދުވަހުގެ ކުރިން ފަރުވާ ކުރިއަށްދާނެ ގޮތުގެ މައުލޫމާތު ފޯރުކޮށްދޭނެ ކަމަށްވެސް އެންސްޕާ އިން ބުނެފައިވެ އެވެ.