މެރިންރިސަރޗް ސެންޓަރާއި ވަރލްޑްވައިޑް ފަންޑް ފޮރ ނޭޗަރ ގުޅިގެން، ދިވެހިރާއްޖޭގެ ކަނޑުމަހާއި ކަންނެލީގެ މަސްވެރިކަމުގައި ބޭނުން ކުރާ ދިރޭއެމުގެ ބާވަތްތަކުގެ މަސްވެރިކަމާގުޅޭ މަސައްކަތުބައްދަލުވުމެއް އައްޑޫ ސިޓީގެ ހިތަދޫގައި މިއަދު ފަށައިފި އެވެ.
ފިޝަރީޒް މިނިސްޓްރީން ބުނި ގޮތުގައި، މިއީ ދެދުވަހުގެ މުއްދަތަކަށް ބޭއްވޭ ބައްދަލުވުމެކެވެ. އަދި މި މަސައްކަތުބައްދަލުވުމުގެ ބޭނުމަކީ ރާއްޖޭގެ ދިރޭއެމުގެ މަސްވެރިކަމަށް ދިމާވާ ގޮންޖެހުންތަކާއި އައިސްފައިވާ ބަދަލުތަކަށް ރިއާޔަތްކޮށް މަސްވެރިންނަށް ދޭންޖެހޭ މައުލޫމާތުދީ އެންވެރިކަން ދެމެހެއްޓުމުގެ ގޮތުން ކުރަންޖެހޭ ކަންކަމުގައި މަސްވެރިން ހޭލުންތެރިވާންވީ ކަންކަމާއި ގުޅޭ ގޮތުން މަޝްވަރާ ކުރުން ކަމަށް މިނިސްޓްރީން ބުނެ އެވެ.
އެގޮތުން އިންޑިއާކަނޑުގައި ކުރާ ކަނޑުމަހުގެ މަސްވެރިކަމާއި ރާއްޖޭގެ ކަނޑުމަހުގެ މަސްވެރިކަމާހުރި ގުޅުން، މަސްވެރިކަމާއި އެންވެރިކަމުގެ މައުލޫމާތުނެގުން، ދިރޭއެމުގެ މަސްވެރިކަމާއި ފަރުތަކާއި ހުރި ގުޅުން، އިންސާނުންގެ ސަބަބުންނާއި މޫސުމަށް އަންނަ ބަދަލުތަކުގެ ސަބަބުން ދިރޭއެންވެރިކަމަށް ކުރާ އަސަރު އަދި މަރުވެގެން އުކާލަންޖެހޭ އެމުގެ ނިސަބަތް މަދުކުރުމަށްޓަކައި މެރިން ރިސާރޗް ސެންޓަރުން ކުރަމުންގެންދާ މަސައްކަތްތަކާއި ގުޅޭގޮތުން މައުލޫމާތު ދޭނެ އެވެ.
ފިޝަރީޒް މިނިސްޓްރީ އާއި ޖަޕާން އިންޓަރނެޝަނަލް ކޯޕަރޭޝަން އާއި ގުޅިގެން މަސްދޯނިފަހަރުގެ އެންވަތްތަކުގެ މަރުނުވެ އެން ގިނަވަގުތު ބޭތިއްބުމުގެ ދިރާސާ ކުރުމަށް ރާއްޖޭގެ މަސްދޯންޏެއްގެ އެންވަތަށް ގެނެސްފައިވާ ބަދަލުތައް މި ބައްދަލުވުމުގެ ބައިވެރިންނަށް ދައްކާލުންވެސް އޮންނާނެ ކަމަށާއި މި ބައްދަލުވުމުގައި ރާއްޖޭގެ ތަފާތު އަތޮޅުތަކުން މަސްވެރިންނާއި ކަމާއި ގުޅޭ ތަޖުރިބާކާރުން ބައިވެރިވާ ކަމަށް މިނިސްޓްރީން ބުނެ އެވެ.
މި މަސައްކަތު ބައްދަލުވުން ފައްޓަވައި ދެއްވުމުގެ ގޮތުން މިނިސްޓަރ އޮފް ފިޝަރީޒް އެންޑް އެގްރިކަލްޗަރ ގެ ނައިބު އަހުމަދު ހާފިޒު ވާހަކަފުޅު ދެއްކެވިއެވެ. އަދި ވަރލްޑްވައިޑް ފަންޑް ފޮރ ނޭޗަރ ގެ ފަރާތުން އުމައިރު ޝާހިދު ވެސް ވާހަކަދެއްކެވިއެވެ.