އިލެކްޝަންސް ކޮމިޝަން (އީސީ) ގެ މެންބަރު ކަމަށް ކުރިމަތިލުމަށް ހުޅުވާލައިފި އެވެ.
އީސީގެ މެންބަރުކަމަށް ހުޅުވާލާފައި މިވަނީ އެ ކޮމިޝަންގެ ނައިބުރައީސްގެ މަގާމުގައި ހުންނެވި އަލީ ނަޝާތު އާއި މެންބަރު މުހައްމަދު އާސިފް މަގާމުން ވަކިކުރަން ރައްޔިތުންގެ މަޖިލީހުން މިމަހުގެ 25 ވަނަ ދުވަހު ފާސްކުރުމުންނެވެ.
ރައީސް އޮފީހުން އީސީގެ މެންބަރު ކަމަށް ކުރިމަތިލުމަށް ފުރުސަތު ހުޅުވާލާފައިވަނީ މިއަދުން ފެށިގެން އަންނަ ޑިސެމްބަރު މަހުގެ ފަސްވަނަ ދުވަހުގެ މެންދުރު 12:00 ގެ ނިޔަލަށެވެ.
އީސީގެ މެންބަރު ކަމަށް ބޭފުޅުން އައްޔަންކުރެވޭނީ އެކަމަށް ކުރިމަތިލުމަަށް ހުޅުވާލުމުން ކުރިމަތިލާ މީހުންގެ ތެރެއިން މަޖިލީހަށް ރައީސް ފޮނުއްވާ ނަންފުޅުތަކުގެ ތެރެއިން ނަމެއް މަޖިލީހުން ފާސްކުރުމުންނެވެ.
އީސީއަކީ ފަސް މެންބަރުންގެ މައްޗަށް އެކުލެވޭ ކޮމިޝަނެއް ނަމަވެސް އެ ކޮމިޝަންގައި މިހާރު ތިއްބެވީ ދެ މެންބަރުންނެވެ.
އެއީ ކޮމިޝަންގެ މެންބަރު ޑރ. މުހައްމަދު ޒާހިރު އާއި މެންބަރު ހަސަން ޒަކަރިއްޔާ އެވެ.
ކޮމިޝަންގެ ރައީސްގެ މަގާމުގައި ހުންނެވި ފުއާދު ތައުފީގުގެ މަގާމުގެ ދައުރު ވަނީ މިމަހުގެ 23 ވަނަ ދުވަހު ހަމަވެފަ އެވެ.
ފުއާދުގެ ދައުރު ހަމަވާތީ އަބްދުލް ހަސީބު އިސްމާއީލް ކޮމިޝަނަށް އައްޔަންކުރަން މަޖިލީހުން ރުހުން ދިން ނަމަވެސް ހަސީބު އެ މަގާމަށް އަދި އައްޔަންކޮށްފައިނުވެ އެވެ.
އެހެންކަމުން ކޮމިޝަންގެ ބައްދަލުވުންތަކަށް ބޭނުންވާ ކޯރަމް ހަމަނުވެ މަސައްކަތްތަކަށް ވަނީ ހުއްޓުމެއް އައިސްފަ އެވެ.