ރާއްޖޭގެ ބާޒާރުގައި މުދަލާއި ހިދުމަތުގެ އަގުތައް މިއަހަރުގެ ސެޕްޓެމްބަރު މަހާ އަޅާބަލާއިރު އޮކްޓޫބަރު މަހު 0.16 ޕަސެންޓް ދަށަށް ގޮސްފި އެވެ.
ނޭޝަނަލް ބިއުރޯ އޮފް ސްޓެޓިސްޓިކްސް (އެންބީއެސް) އިން އާންމު ކުރި މުދަލާއި ހިދުމަތުގެ އަގު ދައްކުވައިދޭ މިންގަނޑު، ކޮންސިއުމާ ޕްރައިސް އިންޑެކްސް (ސީޕީއައި) ދައްކާ ގޮތުގައި މަހުގެ އަގުތަކަށް އައި ބަދަލު ނުހިމަނައި އޮކްޓޫބަރު މަހު އިންފްލޭޝަން ރޭޓް ހުރީ 0.24 ޕަސެންޓް ދަށުގަ އެވެ.
އަގުތައް ދަށަށް ގޮސްފައިވާ ހިދުމަތްތަކުގެ ތެރޭގައި ކަރަންޓް ހިމެނެ އެވެ. އެބައިން 2.64 ޕަސެންޓް ދަށްވެފައިވެ އެވެ.
ތަރުކާރީގެ އަގުތައް 3.91 ޕަސެންޓް އަދި މޭވާގެ އަގުތައް 1.0 ޕަސެންޓް ވަނީ ދަށްވެފަ އެވެ.
ފޮތުގެ އަގުތައް 3.83 ޕަސެންޓް ދަށްވިއިރު ޕެޓްސް އަދި ޕެޓް ޕްރޮޑަކްޓްސްގެ އަގުތައް 6.26 ޕަސެންޓް ދަށްވި އެވެ.
މޯބައިލްގެ އަގުތައް 1.68 ޕަސެންޓް ދަށްވި ނަމަވެސް މޯބައިލް މުވާސަލާތީ ހިދުމަތުގެ އަގު 2.88 ޕަސެންޓް މަތިވެފައިވެ އެވެ. އަދި ކަނޑުމަހުގެ އަގުތައް 1.37 ޕަސެންޓް އުފުލުނެވެ.