ތަރައްގީގެ މަޝްރޫއުތައް -- ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް ކުރި ހޭދަ މިދިޔަ އަހަރާއި އަޅާބަލާއިރު މި އަހަރު 16 ޕަސެންޓް ދަށަށް ހިނގައްޖެ އެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާ ގޮތުން ނޮވެމްބަރު 21 ވަނަ ދުވަހުގެ ނިޔަލަށް ޕީއެސްއައިޕީއަށް 8.8 ބިލިއަން ރުފިޔާ ހަރަދުކުރި އެވެ.
މިއީ މިދިޔަ އަހަރުގެ މި މުއްދަތުގައި ޕީއެސްއައިޕީއަށް ހޭދަކުރި 10.5 ބިލިއަން ރުފިޔާއަށްވުރެ 1.7 ބިލިއަން ރުފިޔާ މަދު އަދަދެކެވެ.
ދައުލަތުގެ ބަޖެޓުގައި މި އަހަރު ޕީއެސްއައިޕީއަށް 8.9 ބިލިއަން ރުފިޔާ ވަނީ ކަނޑައަޅާފަ އެވެ.
ޕީއެސްއައިޕީ މަޝްރޫއުތަކުގެ ތެރެއިން މި އަހަރު އެންމެ ބޮޑު ހޭދައެއްކުރީ އެއާޕޯޓް މަޝްރޫއުތަކަށެވެ. އެއާޕޯޓް މަޝްރޫއުތަކަށް 2.3 ބިލިއަން ރުފިޔާ ހަރަދުކުރިއިރު ބިން ހިއްކުމުގެ މަޝްރޫއުތަކަށް ދެ ބިލިއަން ރުފިޔާ ހަރަދުކުރި އެވެ.
ބްރިޖު މަޝްރޫއަށް 956 މިލިއަން ރުފިޔާ ހަރަދުކުރިއިރު ފެނާއި ނަރުދަމާގެ މަޝްރޫއުތަކަށް 527 މިލިއަން ރުފިޔާ އަދި މަގު ހެދުމުގެ މަޝްރޫއުތަކަށް 525 މިލިއަން ރުފިޔާ ހަރަދުކުރި އެވެ. އަދި ހައުސިން މަޝްރޫއުތަކަށް 577 މިލިއަން ރުފިޔާ ހޭދަކުރި އެވެ.